“Сентерра гоулд” компани Монголын баялгийг дахин цөлмөх ажилдаа оржээ

Монголын баялгийг сүүлийн арван жил хуулийн цоорхойгоор үнэ төлбөргүй гадагш нь зөөсөн гадаадын компани “Сентерра гоулд” Сэлэнгэ аймгийн нутагт  орших “Бороо гоулд”-оосоо нэг дахин их нөөцтэй ордыг Дорнод аймагт илрүүлснийг одоогоор хэн ч мэдээгүй байна.

Сүүлийн арван жилийн дотор 40 тонн алт олборлож, зөөсөн гэгддэг “Сентерра гоулд” Дорнод аймгийн Цагаан-Овоо сумын нутагт дахин шинэ орд илрүүлж хайгуулын ажилдаа идэвхийлэн оржээ. Үүнээс болж нутгийн иргэд хадлан бэлчээрийн талбайгүй боллоо, гүний худгуудын ус багасч, булаг шанд ширгэлээ хэмээн ярьж, сумын удирдлагууддаа гомдол, санал тавьж байгаа хэдий ч нөгөө л АМХЭГ-аас өгсөн зөвшөөрөл, лиценз, албан тоот, баримт бичгүүдээр далайлган амыг нь тагладаг аж.

Дээшээ тэнгэр хол, доошоо газар хатуу гэдэг шиг болсон сумын иргэд есөн сараас эхлэн Улаанбаатар хотод амьдарч буй нутгийнхаа иргэдтэй хамтран ТББ байгуулж, “Бороо”-гийн ордын гашуун түүхийг давтахгүйн тулд эрс шийдвэртэй тэмцэхээр зэхэж байна.