АНУ-ын Ерөнхийлөгчийн сонгуулиар электрон машинаар луйвар хийсэн нь илэрчээ

АНУ-ын Ерөнхийлөгчийн Сонгуулийн дүн гарч өнөөгийн Ерөнхийлөгч Барак Обама Цагаан ордондоо 4 жил улиран суухаар болоод байгаа билээ.
Гэвч NBC агентлагийн мэдээлснээр уг сонгуулийн үеэр Пенсильвани муж улсын сонгуулийн хэсгийн хороон дээр хуурамч тооллого хийж байсан электрон санал тоолох машиныг хураасан байна. Энэхүү хураагдсан электрон санал тоолох машин нь Барак Обамад өгсөн саналыг түүний өрсөлдөгч Митт Ромнид хувиарлан тоолж байсан нь батлагдсан байна.
 

Уг будлианыг программ хангамж зохиодог мэргэжилтэй залуу сонгуулиа өгөх үеэрээ илрүүлсэн бөгөөд түүний Барак Обамад өгсөн санал хяналтын хуудсан дээр М.Ромнид тоологдсон байсныг тэрээр анзаарсан ажээ. Улмаар санал хураалтыг зохион байгуулж буй хэсгийн хорооны ажилтнуудад хандсан боловч түүнд санаа зовох зүйлгүй хэмээн хэлэхээс өөр үйлдэл хийгээгүй гэнэ. Харин сонгогч залуу энэ бүхнийг бичлэг хийн  youtube дээр байрлуулсны дараа л уг машиныг хэсгийн хорооны санал тоолоогоос хураан авсан байна.
 

Ер нь АНУ-ын сонгуулийн үеэр электрон санал тоолох машинтай холбоотой будлиан байнга гардаг юм. Бүр 2000 оны сонгуулийн үеэр Ерөнхийлөгчөө тодруулах хугацаа тодорхойгүй хугацаагаар хойшилсоны нэг шалтгаан нь электрон машин саналын хуудсыг буруу тоолсон явдал байсан юм. Хэдий ийм ч АНУ-д хяналтын тооллогыг заавал хийдэг бөгөөд харин манайд уг электрон тооллогын системийг нэвтрүүлэхдээ хяналтын тоологыг хийхгүйгээр хуулинд тусгасан билээ.