Facebook тэрбум хэрэглэгчтэй

Орчин үеийн интернэтийн хамгийн том вэб сүлжээ  Facebook+ыг Америкийн программ хангамж хөгжүүлэгч, Марк Цукерберг 2004 онд Харвардын Их Сургуулийн оюутан байхдаа ангийн нөхөдтэйгээ хамтран санаачлан байгуулсан билээ. Үүнээс хойш уг вэбийг хэрэглэгчдийн тоо тогтмол өссөөр өдгөө сард тэрбум гаруй хүн тогтмол хэрэглэдэг алдартай сайт болжээ. Мөн Facebook сайтад өдөрт  1.13 тэрбум хүн "like" дарж, 219 тэрбум зураг шинээр байршиж, 7 тэрбум удаа өөрийн вэб хуудсаа шалгадаг байна. Түүнчлэн энэ онд 600 тэрбум хүн гар утсаараа дамжуулан Facebook-т холбогдсон гэсэн судалгаа гарчээ. Facebook сайт анх байгуулагдсанаас хойш хоёр жилийн дараа 2006 онд 25 сая хэрэглэгчтэй байсан бөгөөд хэрэглэгчдийн дундаж нас 19 байсан байна. Харин уг сайтыг Австрали, Канад, Герман, Их Британи, Америк зэрэг орны хэрэглэгч хамгийн их ашиглаж байжээ. Тэгвэл өдгөө 2012 онд Facebook сайт нэг тэрбум хэрэглэгчтэй, хэрэглэгчдийн дундаж нас 22 болсон ба Бразиль, Энэтхэг, Индонез, Мексик, Америк зэрэг орнуудад өргөн ашиглагдаж байна. Мөн Facebook сайтыг Хойд Америкт хамгийн их ашигладаг ба Африк тивийн орнуудад хамгийн бага ашигладаг аж.