О.Цогтгэрэл Оросын Холбооны Улсаас Монгол Улсад суух Онц бөгөөд Бүрэн эрхт Элчин сайд Алексей Николаевич Евсиковийг хүлээн авч уулзлаа

Ардчилсан намын дарга О.Цогтгэрэл Оросын Холбооны Улсаас Монгол Улсад суух Онц бөгөөд Бүрэн эрхт Элчин сайд Алексей Николаевич Евсиковийг хүлээн авч уулзлаа. Уулзалтын эхэнд ОХУ-аас Монгол Улсад суух Онц бөгөөд Бүрэн эрхт Элчин сайд Алексей Николаевич Евсиков намын гишүүдийнхээ дийлэнх олонхын итгэлийг авч Ардчилсан намын даргаар сонгогдсонд баяр хүргэв.

Ардчилсан намын дарга О.Цогтгэрэл хоёр улсын харилцаа, хамтын ажиллагаа өндөр түвшинд хүрснийг онцлон тэмдэглэв. Мөн хоёр улсын эдийн засгийн харилцааг цаашид өргөжүүлэн бэхжүүлэх, хоёр орны улс төрийн намуудын харилцааг эрх тэгш байдлаар тэлэх, чөлөөт худалдаа, аялал жуулчлал, мал аж ахуйн салбарын хамтын ажиллагааг эрчимжүүлэх боломжийн талаар санал солилцлоо.