Зохион байгуулах комисс: Эрэмбэ харгалзан барилдуулах тул залуу бөхчүүд багтахгүй байх магадлал өндөр байна

Энэ долоодугаар сарын 29-30-ны өдрүүдэд Увс аймаг үүсгэн байгуулагдсаны 100 жилийн ойн хүчит 256 бөхийн барилдаан болно. Тэгвэл уг барилдаанд барилдах бөхчүүдийн бүртгэлийг өнөөдөр буюу долоодугаар сарын 28-ны 08:00 цагаас 17:00 цаг хүртэл явагдана гэж Увс аймгийн Биеийн тамир, Спортын газар мэдэгдсэн.

Бүртгүүлсэн бөхчүүдийн тоо 14:00 цагийн байдлаар 320 хүрсэн бөгөөд үүнд улсын цолтон 38, аймгийн арслан 58, аймгийн заан 19, аймгийн харцага долоо, аймгийн начин 39, сумын заан 105, сумын харцага гурав, сумын начин 15, залуу бөх 37 тус тус нэрээ бичүүлсэн байна. Баяр наадам зохион байгуулах комиссын хэлснээр эрэмбэ харгалзан барилдуулах тул сумын харцага, начин цолтнууд болон залуу бөхчүүд багтахгүй байх магадлал өндөр байгаа тухай мэдээллээ.

Заавал өөрийн биеэр очин бүртгүүлэх шаардлагатай энэ барилдаанд өчигдөр буюу долоодугаар сарын 27-нд “Өндөр Гэгээн Занабазарын мэлмий гийсний 390 жилийн ойн даншиг наадам”-д зодоглосон бөхчүүд өдрийн урт, замын холд очиж яваа нь дамжиггүй. Мөн өнөө жилийн улсын баяр наадам болон даншиг наадмын түрүү бөх шинэхэн Арслан Э.Батмагнай барилдахгүй гэдэг ээ мэдэгдээд байгаа юм.

Аваргуудын өлгий нутагт болж буй түүхэн ойн түрүү бөхийн бай шагналд “Лексус 600” автомаркийн машин, үзүүр бөх 3 өрөө байр, их шөвөгт шалгарсан бөхчүүдэд тус тус хоёр өрөө байр амлаад байгаа билээ.

Эх сурвалж:www.polit.mn