ҮСХ: Нэг ажилтанд ногдох сарын дундаж нэрлэсэн цалин 2 сая 622 мянган төгрөг байна

Үндэсний статистикийн хорооноос энэ оны нэгдүгээр улирлын статистик мэдээллийг танилцууллаа. Онцлох мэдээллийг багцлан хүргэж байна. 

Нэг ажилтанд ногдох сарын дундаж нэрлэсэн цалин 2 сая 622 мянган төгрөг байна. голч цалин 2сая 245мянган төгрөг, харин үндсэн цалингийн дундаж 2 сая 386 мянган төгрөг байна.

Ажиллагчдын тоог цалингийн бүлгээр харвал, нийт даатгуулагчийн дотор 1.5-2.5 сая төгрөгийн цалинтай ажиллагчид хамгийн их буюу 27.1 хувийг, 3.0-3.5 сая төгрөгийн цалинтай ажиллагчид хамгийн бага буюу 8.9 хувийг эзэлж байна.

Дундаж цалинг хүйсээр авч үзвэл, 2025 оны 1 дүгээр улиралд эрэгтэйчүүдийнх 2.8 сая, эмэгтэйчүүдийнх 2.4 сая төгрөг байгаа нь эрэгтэйчүүдээс 426.0 (15.0%) мянган төгрөгөөр бага байна.

Нийгмийн даатгалын ерөнхий газрын нийгмийн даатгалын шимтгэл төлөлтийн тайланд 2025 оны 1 дүгээр улирлын байдлаар нийт 53.7 мянган аж ахуйн нэгж, байгууллага (ААНБ)-ын 811.6 мянган ажиллагч хамрагдсан байна.

2025 оны 1 дүгээр улирлын байдлаар НДШ төлсөн ажиллагчдын 50 хувь нь 2 сая 245 мянган төгрөгөөс бага цалинтай байна.

Нийгмийн даатгалын шимтгэл төлөлтийн 2025 оны 1 дүгээр улирлын тайланд хамрагдсан нийт ажиллагчдын 117.6 (14.5%) мянга нь боловсролын, 113.6 (14. 0%) мянга нь бөөний болон жижиглэн худалдаа, машин, мотоциклийн засвар үйлчилгээний, 81.8 (10.1%) мянга нь төрийн удирдлага, батлан хамгаалах үйл ажиллагаа, албан журмын нийгмийн хамгааллын, 76.1 (9.4%) мянга нь боловсруулах үйлдвэрлэлийн, 49.6 (6.1%) мянга нь уул уурхай, олборлолтын, 49.1 (6.0 %) мянга нь хүний эрүүл мэнд, нийгмийн халамжийн, 48.8 (6.0 %) мянга нь тээвэр, агуулахын, 48.3 (6.0 %) мянга нь барилгын, 32.0(3.9%) мянга нь санхүүгийн болон даатгалын, 27.5 (3.4%) мянга нь удирдлагын болон дэмжлэг үзүүлэх, 167.0(20.6%) мянга нь бусад үйл ажиллагааны салбарын ажиллагчид байна.