Х.Баттулга АТГ-т өчигдөр мэдүүлэг өгчээ

УИХ-ын гишүүн Х.Баттулга өчигдөр Авлигтай тэмцэх газарт мэдүүлэг өгчээ.

УИХ-ын гишүүн Х.Баттулга өмгөөлөгч М.Пүрэвбаатарын хамтаар "Төгрөг нуур"-ын ордтой холбоотой асуудлаар 4 цаг орчим тайлбар мэдүүлэг өгсөн байна

ЗГХЭГ-ын дарга Н.Учрал Засгийн газрын хуралдааны мэдээллийг танилцуулах үеэрээ "Төгрөг нуур"- ордтой холбоотой 507 хуудас материал дэргэдээ гаргаж ирсэн бөгөөд уг материалаа шалгалуулахаар АТГ-т өгсөн байдаг.

Тухай материал дунд 2006 онд УИХ-ын гишүүн Х.Баттулга 90 хувийг нь, Я.Батсүх гэдэг иргэн 10 хувийг нь эзэмшиж байсан, анх хамтран үүсгэн байгуулсан CAMEX гэх компани "Төгрөг нуур энержи" компанийг 100 хувь эзэмшдэг болох тухай. Х.Баттулга өөрийн охин Б.Намуун, төрсөн эгч Х.Цэндбаяр нарт хувьцаагаа шилжүүлэн компаниас компани дамнасан, офшороос офшорт үргэлжилсэн хэлхээ холбоо бүхий үндэстэн дамнасан компаниудаар дамжуулан 250 сая ам.доллараар зарсан нь Хонконгийн хөрөнгийн биржид бүртгэлтэй 00402 хувьцааны код бүхий компанийн мэдээлэл багтсан байна.

Тэгвэл өнгөрсөн 7 хоногт УИХ-ын гишүүн Х.Баттулга Цагдаагийн байгууллагад хандаж “Төгрөг нуурын орд” миний мэдэлд байгаа эсэхийг тогтоож, олон нийтэд мэдээлэхийг хүссэн.