Н.Учрал: Өнөөдрөөс эрүүл мэндийн салбарын тусгай зөвшөөрлийн хүсэлтийг 20-30 минутад цахимаар хүлээн авч, хуульд заасан 22 хоногт багтаан шийдвэрлэнэ

Зөвшөөрлийн тухай хуулийн хэрэгжилтийг хангах үүднээс хүнд суртал үүсгэж буй журмуудыг цуцалж эхэлсэн. Тэгвэл энэ удаа Эрүүл мэндийн яам чөдөр тушаа болсон журмуудаа цуцалжээ.

Энэ талаар ЗГХЭГ-ын дарга Н.Учрал "Эрүүл мэндийн салбараа хөгжүүлье гэсэн сэтгэлтэй, зүтгэлтэй хүмүүс эмнэлэг байгуулахын тулд хууль давсан журмаар тусгай зөвшөөрлөө 50-иас дээш хоног хүлээнэ. 15 төрлийн баримт бичиг бүрдүүлж 138 шат дамжлага давах шаардлагатай тулгарч, улмаар шантраад больж байна.

Тийм учраас Эрүүл мэндийн яам “Зөвшөөрлийн тухай хууль”-ийн хэрэгжилтийг хангуулж төрийн хүнд суртал, салбарын хөгжлийн чөдөр тушаа болсон журмуудаа цуцаллаа.

Өнөөдрөөс эрүүл мэндийн салбарын тусгай зөвшөөрлийг 20-30 минутад багтаан цахимаар хүлээн авч, хуульд заасан 22 хоногт багтаан шийдвэрлэнэ. Салбар бүрийн хууль давсан бүртгэл, журам бага багаар цуцлагдаж хүнд суртал буурсаар байна" гэжээ.