Ерөнхий сайд маргааш БНХАУ-ын Харбин хотыг зорьж, “Гашуунсухайт-Ганцмод боомтын төмөр зам”-ын гэрээг эцэслэнэ

“Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээр”-т гарын үсэг зурах ажиллагаа маргааш болно.

Албаны эх сурвалжийн мэдээлж буйгаар өнөөдөр Аж, үйлдвэр, эрдэс баялгийн сайд Ц.Туваан, Зам тээврийн сайд Б.Дэлгэрсайхан болоод албаны хүмүүс БНХАУ-ын Харбин хотыг зорьжээ. Харин маргааш Ерөнхий сайд Л.Оюун-Эрдэнэ БНХАУ-д албан ёсны айлчлал хийж, Монгол Улсын Засгийн газар болон БНХАУ-ын Засгийн газар хоорондын хэлэлцээр”-т гарын үсэг зурах ажиллагааг албан ёсоор эхлүүлэх аж.

Дашрамд дуулгахад, БНХАУ-ын Харбин хотод Азийн өвлийн спортын IX наадам болж буй бөгөөд айлчлалын хүрээнд Монгол Улсаас зорин очсон зочид төлөөлөгчид уг наадмын хаалтын үйл ажиллагаанд уригдан оролцоно.