Дарханы төмөрлөгийн үйлдвэрийг улс орны бас нэгэн амин сүнс гэж хэлж болно.

Гэтэл энэхүү чухал үйлдвэрийн захирлаар Г.Дугаржав гэгчийг томилсон. Энэ үед учир мэдэх хүмүүс “Энэ хүнд ёстой суудал нь тохирсонгүй дээ… “УИХ-ын гишүүн Т.Доржхандыг л сайн санхүүжүүлэх юм байна…”, “Ам ажил хоёр нь алд дэлэм зөрдөг хүн дээ..” гэхчлэнгээр ярьж  байв.

Угтаан бол олны үг ортой гэдэг энэ л дээ.

Өнгөцхөөн түүх өгүүлэхэд тус үйлдвэрийн захирлаар томилогдсон даруйдаа буюу жил гаруйн өмнө энэ Г.Дугаржав гэгч “Нийгмийн хариуцлагын хүрээнд ажилчдаа орон сууцаар хангана. Барилгын гол түүхий эд арматур төмрийг өөрсдийнхөө гангийн үйлдвэрээс, цементээ “Хөтөл цемент шохой” компаниас авна. Тэгэхээр барилгын үнэ өртөг мэдээж хямд байна…” гэх зэргээр хэдэн муу сайн ажилчдынхаа хүсэл, хэрэглээн дээр  ТАНЦ ЭРГЭЖ байв. Улмаар “Монгол ган” нэртэй 800 айлын орон сууцны цогцолбор барихаар 2023 оны 3 дугаар сард Дархан-Уулын Засаг дарга Азжаргал болон хэсэг бусаг нөхөдтэй тууз хайчилж байсан нь саяхан.

Гэтэл энэ хүнийг  АТГ-аас 48 цагийн хугацаатайгаар саатуулж орхилоо. Шалтгаан нь “эрх мэдэл, албан тушаалын байдлаа урвуулан ашиглаж, компаниудад төмрийн баяжмалыг хууль бусаар өгч, татваргүй хилээр гаргасан”  гэх үндэслэл аж. Өмнө ч тэрбээр “Төмрийн хүдрийн агуулгыг гааль дээр худал мэдүүлж ашиг олох замаар улсад их хэмжээний хохирол учруулсан гэх хэргээр шалгаж байсан гэдэг.

Ийм л нэг  ам ажил 2 нь алд дэлэм байтугай зөрсөн нөхөр өнөөдөр мэргэжлийн байгууллагын хараанаас мултарч чадсангүй.

Мөн 800 айлын орон сууцны хороолол ч бүдгэрсэн бөгөөд тухайн барилыг барьж буй гүйцэтгэгч компани нь өдгөө Хятад арматур төмөр хэрэглэж байх жишээтэй.

Хувьд хууль бусаар шилжсэн үйлдвэрүүдээ эргүүлэн авч байгаа нь хэдийгээр сайшаалтай ч тэрхүү чухал газруудаа хэнээр хашуулж мануулахаа сайтар тунгаахгүй бол Г.Дугаржав мэтийн нөхдүүд самарсаар байх нь байна шүү.