​ Ерөнхий сайд аа, Л.Энх-Амгалан нэр дэвших эрхтэй юу

МАН-ын удирдлагууд XXX Их хурлынхаа үеэр авлига, албан тушаалын хэрэгт нэр холбогдсон хүмүүсээ дараа, дараагийн удаа аль ч шатны сонгуульд нэр дэвшүүлэхгүй гэдгээ мэдэгдсэн.
Тэд хэлсэндээ хүрвэл өнөөгийн парламент болон Засгийн газрын олон гишүүн УИХ-ын сонгуульд нэр дэвших эрхгүй болно. Тэдний нэг нь УИХ-ын гишүүн, БШУ-ны сайд Л.Энх-Амгалан.
Тодруулбал, тэр өдгөө олон нийтийн анхаарлыг хамгийн ихээр татаж буй Боловсролын зээлийн сангаас олгогдсон зээл, тэтгэлгийн асуудал. Одоо ч шалгаж дуусаагүй байгаа энэ хэргийг шалгах явцад Л.Энх-Амгалан өнгөрсөн онд сангийн зээлийн журмыг зөрчин хэд, хэдэн хүнийг зээлийг чөлөөлсөн нь илэрчээ.
Мань сайд Л.Энх-Амгалан 2023 оны хоёрдугаар сарын 01-нд "Гэрээний үүргийг дуусгавар болгох тухай" А/31 дугаартай тушаал гаргаж, гэрээний дагуу Монгол Улсад 5 болон түүнээс дээш жил үр бүтээлтэй ажиллаж, нийгмийн даатгал төлсөн гэх нэр бүхий 71 иргэний гэрээний биелэлтийг тооцов гэжээ.
Тэдгээр 71 хүний дунд улстөр, урлаг соёлынхны хамаарал бүхий хүмүүсийн зээлийг чөлөөлөхдөө журам зөрчхөж.

 
Тухайлбал, Монгол Улсын Төрийн хошой шагналт, Ардын жүжигчин, Хөдөлмөрийн баатар, хөгжмийн зохиолч Н.Жанцанноровын хүү Дамдинцэрэн. УИХ-ын гишүүн асан Р.Рашийн охин Оргилмаа, Ерөнхий сайд Л.Оюун-Эрдэнийн зөвлөх Я.Төмөрбаатарын охин Энхжин, УИХ-ын гишүүн асан Д.Оюунхоролын хүү Ж.Төрболд, “Утаа эсрэг жагсаал”-ын “эзэн” Ц.Пүрэвхүү гээд урт жагсаалт байна. Дээрх нэр бүхий хүмүүсийн ихэнх нь Монгол Улсад ажиллаж “өрөө” төлж дуусаагүй байхад эрхэм сайдтан гарын үсэг зурж, гэрээний үүргээ биелүүлсэн гэж дүгнэсэн байгаа юм.
Тиймээс хуулийн байгууллагын шалгаж буй Боловсролын зээлийн сантай холбоотой асуудалд хуйвалдаж, хутгалдсан БШУ-ны сайд Л.Энх-Амгаланд чинь ирэх сонгуульд нэр дэвших эрх үлдсэн эсэхийг Ерөнхий сайд Л.Оюун-Эрдэнэ танаас асууя.