Орон сууцны хорооллуудад стандарт хэрэгтэй байна

Сар шинийн босгон дээр орон сууцны хорооллынхон багагүй бухимдалтай байна. Учир юу гэвэл  ус дулааны мөнгө нь  бараг 2-3 дахин нэмэгдчихэж.

Сардаа 59 мянган төгрөг төлдөг байсан бол бүр 100, 120, 140 орчим мянган төгрөг болчихоор хэн хүнгүй л бачуурч, цухалдах нь тодорхой.

Яг ижил хэмжээтэй  байранд амьдардаг 2 айл байлаа гэхэд Хан-Уул дүүрэгт  амьдардаг өрхийнх  арай их төлж байхад, СХД-т амьдардаг  айл арай бага төлж байх жишээтэй.

Энэ нь орон сууцны хорооллуудын халаалт ус, дулаан, талбай зэргийн үнэлгээнд нэгдсэн нэг стандарт баримталдаггүйн нотолгоо юм.

Зөвхөн ганц жишээ дурдахад хотын А бүсэд байх орон сууцны нэгэн хорооллын өрхүүдийн ус дулааны төлбөр огцом нэмэгджээ. Сургуулийн хүүхэд нь амарсан болохоор сар гаруй зусландаа агаарлаж байгаад иртэл 129 мянган төгрөг бичигдсэн байж...

Ийм  гомдол тавьж буй айл өрхүүд олон байсан бөгөөд эзэнгүй айлд  мэдээж ийм хэмжээний мөнгөн дүн гарах учиргүй гэж оршин суугчид өгүүлж байв.

Өөрсдийгөө хохирсон, гомдолтой гэж буй иргэд ОСНААГ-ын харьяа “Бадамлах нар” гэх контортоо хандахад харилцааны соёлгүй, бүдүүлэг загнаж “Та нарын хэр зэрэг ус хэрэглэснийг би яаж мэдэх юм...” Танай хорооллынхон дандаа ийм юм ярьж байдаг...” гэж тас загнаад утсаа салгадаг байна. Ер нь орон сууц хариуцсан конторуудын хариулт  "Ийм стандарттай" юм шиг  аашилдаг  байна. 

Дээшээ тэнгэр хол доошоо газар хатуу гэгч болсон иргэд арга буюу хэвэл мэдээлэлд хандаж, сүүлдээ УСУГ-ын даргыг ч буруутгаж буй аж.

Иргэдийн зүгээс буруутгаж буй шалтгаан нь “Монголын ус үнэгүй, хямд, зөвхөн тээвэрлэсэн үйлчилгээнийхээ хөлсийг л авдаг...” олон нийтийн мэдээллийн хэрэгслээр хэдэнтээ ярьснаас нь хойш ийм асуудал болж байгаа гэж үзэж буй аж.

Ер нь  он солигдсоны дараа ус дулаан, цахилгаан гээд   айл өрхүүдийн хураамж ямх ямхаар нэмэгддэг ч энэ удаа  бүр 2-3 дахин нэмэгдсэнд орон сууцны хорооллуудынхан бухимдалтай байна.

Тиймээс  л тэд “Орон сууцны хорооллуудад нэгдсэн нэг стандарт баримталмаар байна” гээд буй хэрэг хэрэгтэй байна.

Тэгээд ч айл өрхүүд  хэрэглэж буй цахилгаан, усны тоолуураа хянаж,  лимитнээс нь хэтрэх хандлагатай тохиолдолд сигнал өгдөг тэр технологийг суурилуулж яагаад болохгүй гэж. Өмнөд хөршид бол аль 2015 оноос хэрэгжиж эхэлсэн шүү дээ.