СХЭМТ-ийн дарга Ч.Өнөрсайхан огцрох болзлоо хангажээ

Эмч нар уг нь “Эрдэнэт хүмүүний амь, нас, эрүүл мэндийн төлөө, Эрдэм чадал, бие сэтгэлээ бүрнээ зориулж явахаа Эх орон, ард түмэндээ андгайлан тангараглая, тангараглая” гэж тангараг өргөдөг. Гэтэл тангараг өргөсөн эмч бусдын эрүүл мэнд бус өөрийн хэтэвчээ зузаатгахын төлөө ихэд хүчин чармайлт гарган ажилладаг болчхоод байна.

Тэдний нэг нь Сонгинохайрхан эрүүл мэндийн төвийн дарга Ч.Өнөрсайхан. Мань дарга татвар төлөгчдийн мөнгөөр бий болгосон төсвөө гарын салаагаар урсгаж, өөрт ашигтай, хэрэгтэй компанитайгаа шууд гэрээ байгуулдаг аж.

 Уг нь хуульд зааснаар бол төрийн болон төрийн өмчит аж ахуйн нэгж 20 сая төгрөгнөөс дээш үнийн дүнтэй худалдаа, ажил үйлчилгээ гүйцэтгүүлэхэд тендер зарлах учиртай. Гэтэл Ч.Өнөрсайхан дарга ББСМО ХХК-тай 136 сая төгрөгийн үнэ бүхий зураг төслийн ажлыг гүйцэтгүүлэхээр шууд гэрээ байгуулсан байна. Түүний энэ үйлдэл нь Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай, Төрийн хэмнэлтийн тухай хуулиудыг зөрчиж байгаа юм. Тэр ч утгаараа Засгийн газраас хэрэгжүүлж байгаа 5 Ш ажиллагааны хүрээнд хуулиас давсан эрх мэдэлтэй Ч.Өнөрсайхан даргыг шалгаж, төсвийг хохиролгүй болгох шаардлага баймаар юм. Эс бөгөөс эмнэлгийн дарга бүр Ч.Өнөрсайхан шиг дураараа дургиж, дунд чөмгөөрөө жиргээд байвал татвар төлөгчдийн хөрөнгө хаашаа урсах нь ойлгомжтой болох биз ээ.