Д.Гантулга, Д.Мурат нарын хэрэгт яллах дүгнэлт үйлдэж, шүүхэд шилжүүлжээ

Нийслэлийн прокурорын газраас УИХ-ын гишүүн Д.Мурат, УИХ-ын гишүүн асан Д.Гантулга нарт холбогдох эрүүгийн хэргийг хянаж дуусаад яллах дүгнэлт үйлдэж шүүхэд шилжүүлжээ. Тодруулбал тэдний гэм буруутай эсэхийг тун удахгүй шүүх хурлаар хэлэлцэж тогтоох нь. Гэхдээ шүүх хурлын тов хараахан тодорхой болоогүй байна.

-Д.МУРАТ ГУРВАН САР ХҮРТЭЛХ ХУГАЦААГААР ЗОРЧИХ ЭРХЭЭ ХЯЗГААРЛУУЛАХ 
ЯЛ СОНСОХ МАГАДЛАЛТАЙ-

Б.Бахытгүл гэх эмэгтэйг зодсон гэх хэргээр ялагдаж буй УИХ-ын гишүүн Д.Муратад Эрүүгийн хуулийн 11.6.1дэх хэсэгт  зааснаар яллах дүгнэлт үйлджээ.

11.6 дугаар зүйл.Хүний эрүүл мэндэд хөнгөн хохирол учруулах

1.Хүний эрүүл мэндэд хөнгөн хохирол учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.

-Д.ГАНТУЛГЫН ГЭМ БУРУУТАЙ НЬ ТОГТООГДВОЛ ТАВАН ЖИЛ ХҮРТЭЛХ 
ХУГАЦААГААР ХОРИХ ЯЛААР ШИЙТГҮҮЛНЭ-

Харин Ч.Наранзаяа гэх бүсгүйг хүчирхийлсэн хэргээр буруутгагдаж буй гишүүн асан Д.Гантулгад Эрүүгийн хуулийн тусгай ангийн 12.1.1 дэх хэсэгт зааснаар яллах дүгнэлт үйлдсэн байх юм.

12.1 дүгээр зүйл.Хүчиндэх

1.Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ.

Эх сурвалж: Medee.MN