Бусад улсын Ерөнхийлөгч ингэдэг юм байна, харин Монгол Улсын Ерөнхийлөгч яадаг юм бол?

...Хар тамхины дуулианд нэр нь холбогдсон хүүгээ буруутай нь тогтоогдвол цаазлах тушаал өгөхөө Филиппиний ерөнхийлөгч Родриго Дутертэ мэдэгдлээ. Сөрөг хүчний парламентын гишүүн түүний хүү Пауло Дутертэг Хятадаас Филиппинд их хэмжээний метамфетамин хэмээх мансууруулах бодис нууцаар оруулж ирдэг Хятадын триадын (мафи) гишүүн байсан гэх баримтыг тараасан юм. 

Энэ үйл явдлын дараа буюу өчигдөр Ерөнхийлөгч Дутертэ Засгийн газрын албан хаагчдын өмнө үг хэлэхдээ “Хэрвээ энэ хэрэг үнэн бол чамайг /Пауло Дутертэ/ алах тушаалыг би өгнө. Бүр чамайг алах даалгавар авсан цагдааг ч хамгаалах болно гэж би түүнд хэлсэн” гэж ярьсан байна.

Өнгөрсөн оны дундуур Филиппиний ерөнхийлөгчөөр сонгогдсон 72 настай Родриго Дутертэ нийгмийг цэвэрлэхийн тулд 100,000 хүртэл тооны донтогсод, хар тамхины наймаачдыг устгахаа амлаж байсан юм. Өнөөдрийн байдлаар түүний дайнд 3,800 орчим хүн алагдаж, дахин хэдэн мянган хүн тодорхойгүй шалтгаанаар алагдаад байна. 

...Солонгосын Кёнги дүүргийн Засаг дарга Нам Кёнг Пил энэ сарын 19-ний өглөө хэвлэлийнхэнд мэдээлэл өгчээ. Тэрбээр “Миний хүү байж боломгүй гэмт хэрэг үйлдсэн. Би түүнд хуулийн дагуу хамгийн хүнд ял оноохыг хүсч байна. Харин эцэг хүний хувьд хүүхдээ хүмүүжүүлж чадаагүйдээ намайг Засаг даргаар сонгосон Кёнги дүүргийн 10 сая гаруй иргэнээс уучлалт гуйя. Энэ хэрэгтэй холбогдуулан манай намын зүгээс надад хүлээлгэх бүх шийтгэлийг би хүлээж авна. Надад уучлаарай гэж хэлэхээс өөр үг олдохгүй байна” хэмээн мэдэгджээ. Учир нь түүний 26 настай хүү цагдаагийн байгууллагад мансууруулах бодис хууль бусаар хил давуулсан, бусдыг мансууруулах бодис хэрэглэх явдалд уруу татсан, өөрөө хэрэглэсэн, хадгалсан хэргээр саатуулагдсан байна. Нам Кёнг Пилийн хувьд улс төрчдийн дунд рейтинг өндөртэй нэгэн бөгөөд тэрээр ирэх жил болох Засаг даргын сонгуульд дахин өрсөлдөхөөр бэлтгэж байсан  

Харин Монголд...

Хар тамхины хэрэгт холбогдсон хүүхдүүдээ хамгийн хүнд ялаар шийтгэх шийдвэр гаргасан Филиппиний Ерөнхийлөгч, БНСУ-ын Кёнги дүүргийн Засаг даргын гайхалтай ёс суртахуун, улс төрийн соёлыг сайшаахгүй байхын арга алга. Тиймээс ч тэдний мэдэгдлийг дурдаж, жишээ болгон дээр өгүүлсэн нь учиртай. Өнөөдөр "цагаан тахал" нэрээрээ алдаршиж, дэлхий дахиныг айдаст автуулаад буй "Хар тамхи"-ны хэрэг нэгэнт газар авсан. "Монгол хүний удмын санд хар тамхины хор хөнөөл нөлөөлж эхэлсэн" судалгааг ч мэргэжилтнүүд гаргаад амжсан нь "Хар тамхи" Монголд ямар аймшгийн хэмжээнд хүрснийг бэлхнээ нотолно. 

 Цагдаагийн байгууллагад энэ төрлийн гэмт хэрэг ихээр бүртгэгдэж, шүүхээр шийдвэрлэгдэх хэргийн тоо өссөөр байгаа нь "Хар тамхитай тэмцэх" хатуу бодлого дутагдаж байгаагийн илрэл юм. Бүр сүүлдээ Монголын нэртэй төртэй улс төрчдийн хүүхдүүд, олны танил алдартнуудын "эрх жаалууд" энэ төрлийн гэмт хэрэгт нэр нь холбогдож, нийтэд ил болж эхэлснийг уншигч та санаж буй биз ээ.

Ганцхан жишээ энд дурдъя.