О.Баасанхүү: Шинэ Эрүүгийн хуулиар эх орноосоо урвагчдыг өршөөлөө

УИХ-ын чуулганы өнөөдрийн нэгдсэн хуралдаанаар Эрүүгийн хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хийж, баталсан.Тэгвэл тус хуулийг баталсныг эсэргүүцэн УИХ-ын гишүүн О.Баасанхүү мэдээлэл хийлээ.  Шинээр батлагдсан Эрүүгийн хуулийн 19.1 заалтад “Монгол Улсын иргэн Монгол Улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилгоор дайны, дайн бүхий байдалд зэвсэгт халдлага мөргөлдөөн, түрэмгийллийн үед дайсны талд дэмжлэг үзүүлсэн, хамтран ажилласан бол 12-20 жил хүртэл эсвэл бүх насаар нь хорино” гэж заасан. Энэ нь эх орноосоо урвах гэдэг заалтыг соёлтойгоор байхгүй болгосон байгаа юм. Эрүүгийн хуулийн нэмэлт өөрчлөлтөөр зөвхөн дайны үед эх орноосоо урвах гэдэг заалт хамаарна. Бусад тохиолдолд хамаарахгүй болж буй нь ноцтой зүйл.  Монгол Улсын иргэн гадаад улсын тагнуулын албатай хамтран ажиллахаар тохиролцсон хамтран ажилласан гадаадын иргэн байгууллагад шилжүүлэн өгөх зорилгоор төрийн нууцад хамаатай мэдээ, баримт, эд зүйлийг хулгайлсан, хадгалсан, дамжуулсан бол 8-15 жилээр ял шийтгүүлнэ” гэдэг заалт шинээр батлагдсан нь маш ноцтой заалт. Ийм л аюултай хуулийг ирэх долдугаар сарын 1-нээс мөрдөж эхлэх гэж байна” гэв.

Цаашид гишүүн үе үеийн Тагнуулын газрын дарга нартай уулзаж, Эрүүгийн хууль хэрэгжихээс өмнө нэмэлт, өөрчлөлт оруулахаар ажиллах юм байна.

Тэрчлэн шинэ хуулийг баталсны зарим иргэд цахим ертөнцөд шүүмжлэл дайв. Тухайлбал, УИХ-ын  гишүүн асан С.Ламбаа “Энэ хууль батлах ажил ер нь юу болоод байна. Долоо хоноод л хуулиа өөрчилнө. Баталчихаад нэг л биш боллоо гэнэ.Тоглоод байна уу” хэмээн жиргэсэн байна.

EAGLE.MN