Ц.Нямдоржийн хурлаа орхин хаалга саван гарах болсон шалтгаан

УИХ дахь МАН-ын бүлэг өчигдөр ээлжит бусаар хуралдаж, зөвлөлдөх санал асуулгын тухай хэлэлцсэн. Өнгөрсөн долоо хоногт Зөвлөлдөх зөвлөлөөс хоёр үе шаттайгаар зохион байгуулагдсан зөвлөлдөх санал асуулгын ерөнхий дүнг УИХ-ын дарга М.Энхболдод өргөн барьсан билээ. Энэ үеэр Зөвлөлдөх зөвлөлийн гишүүн, МАН-ын ахмад хуульчдын нэг Д.Лүндээжанцан “УИХ-аас яаралтай ажлын хэсэг байгуулж, ард нийтийн санал асуулгыг Ерөнхийлөгчийн сонгуультай хамтад нь зохион байгуулах хэрэгтэй” гэсэн байр суурь илэрхийлсэн аж.

Өчигдөр болсон бүлгийн хуралдааны үеэр Д.Лүндээжанцан, Г.Занданшатар нар дээрх байр суурийг илэрхийлсэн бол гишүүд нийтлэг байдлаар “Эцэг хуулиндаа яаран сандран өөрчлөлт оруулж болохгүй. Тэр дундаа Ерөнхийлөгчийн сонгуультай хамтатган, ард нийтийн санал асуулга зохион байгуулах нь буруу. Сонгуулийн үеэр иргэдийн анхаарал сарнисан байдаг” гэсэн байр суурь илэрхийлсэн байна. Улмаар УИХ дахь МАН-ын бүлгийн хуралдааны үеэр Ц.Нямдорж гишүүн “Ерөнхийлөгчийн сонгуультай зэрэгцүүлж, Үндсэн хуульд өөрчлөлт оруулах санал асуулгыг ард нийтээс асуух нь буруу. Үндсэн хуульд өөрчлөлт оруулах асуудалд гоомой хандаж болохгүй учраас би эцсээ хүртэл эсэргүүцнэ” хэмээн хэлээд хаалга саван гарч одсон талаар зарим гишүүд онцлов.

PAPARATSI.MN