Тэтгэврийн насыг жил тутам 6 сараар нэмэгдүүлж, хүүхдийн мөнгө олгохгүй байхаар тусгасан тодотгол

Засгийн  газар, ОУВС-тай  хамтран  гурван жилийн  хугацаатай  “Өргөтгөсөн  санхүүжилтийн  хөтөлбөр”  хэрэгжүүлэхээр тохиролцсон. Ингэхдээ төсвийн  сахилга  батыг чангатгаж, орлого, зарлагаа тэнцвэржүүлэх замаар санхүүгийн тогтвортой байдал бий болгохоор зорьж буй. Энэ хүрээнд энэ оны төсвийн тодотголыг УИХ-д өргөн мэдүүлээд байгаа. Сангийн сайд Б.Чойжилсүрэнгийн УИХ-д өргөн бариад буй 2017 оны төсөв, 2018-2019 оны төсвийн төсөөллийн талаарх онцлох 24 баримтыг хүргэж байна.

1. Төсвийн тодотголоор Монгол Улс энэ жил зургаан их наяд төгрөгийн орлого олох бол 8.7 их наяд төгрөгийн зарлагатай ажиллана.

   ---

2. Төсвийн алдагдал 2.77 их наяд төгрөг болж, дотоодын нийт бүтээгдэхүүний 10.6 хувьтай тэнцэнэ. Өмнө нь 9.1 хувьтай дүйж байсан юм.

   ---

3. Төсвийн нийт зарлагын 15 хувийг зээлийн хүүгийн төлбөр эзэлнэ.

   ---

4. Энэ удаагийн төсвийн тодотголоор нийгмийн халамж, хөрөнгө оруулалт, татаас шилжүүлгээ бууруулах алхам хийгээгүй.

   ---

5. Орлого буурч, зарлагыг нэмэгдүүлснээр төсвийн алдагдлыг 400 тэрбумаар өснө.

   ---

6. Зургаан төрлийн татвар нэмж, хэд хэдэн халамжийн бодлогоос татгалзана.

   ---

7. Татварын орлого 65.8 тэрбум төгрөгөөр өснө.

   ---

8. Татварын бус орлого 966.2 тэрбум болж, 200 орчим тэрбум төгрөгөөр буурна.

   ---

9. Төсвийн зарлагыг бууруулахын тулд хүүхдийн мөнгийг зорилтод бүлэгт олгох, ирээдүйд нөхөн олгохгүй байхаар тусгасан.

   ---

10. Тэтгэврийн насыг үе шаттай нэмэгдүүлнэ. Тодруулбал ирэх оноос эхлэн 1 жилд 6 сараар нэмэгдүүлэх төлөвлөгөөг урьдчилан зарлаж хэрэгжүүлэхээр тооцжээ.

    ---

11. Засгийн газраас шатахууны импортлогчдод татварын хөнгөлөлт үзүүлэхээр болсон ч ирэх долдугаар сарын 1, аравдугаар сарын 1-ний өдрөөс эхлэн хоёр үе шаттай буцаан нэмэгдүүлэхээр тусгасан.

    ---

12. 4500-ээс  жижиг  хөдөлгүүрийн багтаамжтай  суудлын  автомашинд  үйлдвэрлэсэн  оноос  хамаарч 3-15  хувь буюу  25 мянгаас 2.2 сая   төгрөгөөр,  4501-ээс том  хөдөлгүүрийн  багтаамжтай суудлын автомашинд  40-250  гаруй  хувь  буюу  дөрвөн саяас 47 сая төгрөг хүртэл татварын хэмжээг нэмэгдүүлнэ.

    ---

13. Хос тэжээлт, цахилгаан хөдөлгүүрт болон хийгээр  ажилладаг  автомашины  онцгой  албан  татварыг  50  хувиар  хөнгөлөхөөр хуулийн  төсөлд  тусгасан  бөгөөд  эдгээр  автомашинд  375 мянгаас 6.6 сая  төгрөгийн татвар ногдуулна.

    ---

14. Татварын хувь хэмжээг нэмэгдүүлж, зарим хөнгөлөлтийг бууруулснаар улсын төсвийн орлого 2017 онд 37 орчим, 2018 онд 82 орчим, 2019 онд 98 орчим тэрбум төгрөгөөр тус тус нэмэгдэхээр байна.

    ---

15. Архи, тамхины онцгой албан татварыг үе шаттай нэмэгдүүлж, ирэх ирэх жил 10  хувь, 2019-2020 онуудад таван хувиар нэмэхээр төсөлд тусгасан байна.

    ---

16. Импортын  тамхинд  ногдох  гаалийн  албан  татварыг  ирэх сарын 01-ний өдрөөс эхлэн нэмэгдүүлнэ. Ингэснээр  гаалийн  болон  НӨАТ-ын  орлого  20  тэрбум төгрөгөөр  өснө.

    ---

     

17. 2017  оны  тодотголоор  импортын  гаалийн  албан  татвар  413.8 тэрбум төгрөгт хүрч, батлагдсан хэмжээнээс  18 тэрбум төгрөгөөр өсөхөөр байна.

    ---

18. Хуулийн дагуу ирэх оны нэгдүгээр сарын 1-ний өдрөөс эхлэн иргэдийн хадгаламжийн хүүгийн  орлогод  татвар  ногдуулж  эхлэх байсан ч төсвийн тодотголоор татвар  ногдуулах  хугацааг  есөн  сараар урагшлуулж, ирэх сарын 1-ний өдрөөс эхлэн ногдуулахаар болжээ.

    ---

19. Хувь хүний орлогын албан татварын орлого 2017 онд 43 гаруй тэрбум төгрөгөөр нэмэгдэх тооцоо гарчээ.

    ---

20. Тэтгэврийн даатгалын шимтгэлийн хувь хэмжээг ажил олгогч болон даатгуулагч тус 2.5  нэгжээр  (нийт  5.0  нэгжээр),  сайн  дурын  даатгуулагчийн  төлөх  шимтгэлийг  мөн ижил  аргачлалаар  2.5  нэгжээр  нэмэгдүүлэхээр  төлөвлөсөн. Ингэснээр ажил олгогчийн төлөх шимтгэлийн хэмжээ 12.7 хувь,   албан  журмын  болон  сайн  дурын  даатгуулагчийн  төлөх  шимтгэлийн  хэмжээ 12.5 хувьд хүрэхээр байна

    ---

21. 2017 оны төсвийг батлахдаа Төрийн банк, Монголын хөрөнгийн бирж, “Оргил” рашаан сувилал зэрэг долоон аж ахуйн нэгжийг хувьчилж, 177 тэрбум төгрөг төвлөрүүлнэ гэж тусгасан ч хувьчлах аж ахуйн нэгжүүдийн жагсаалтаас хасчээ. Өөрөөр хэлбэл, төр өмчөө хувьчлахаа больсон гэсэн үг.

    ---

22. Төсвийн орлого 2018 онд 6.8, зарлага 9.45, алдагдал нь 2.64 их наяд төгрөг болно гэж Засгийн газар төсөөлжээ.

    ---

23. 2019 онд төсвийн орлого 7.8, зарлага 9.97, алдагдал нь 2.1 их наяд төгрөг болно гэж таамаглаад байна.

    ---

24. Засгийн газрын өрийн хэмжээ 2019 онд 23.5 их наяд төгрөгт хүрч, өснө гэж тэд үзжээ.

24tsag.mn