Snapchat Ferrari-гаас өндөр “үнэтэй” болов

Өчигдөр Нью Йоркийн хөрөнгийн бирж дээр хувьцаагаа гаргасан Snap компанийн зах зээлийн үнэлгээ 34 тэрбум ам. доллартой тэнцлээ. Нэгж хувьцаагаа 17 ам. доллароор үнэлсэн хэдий ч нээлтийн ханш 24 ам. доллар байсан бөгөөд хаалтын ханш 24,51 ам. доллар байв.

Өнгөрсөн жилүүдэд хэдийгээр хэрэглэгчийн тоо байнга өсөж, нэг хэрэглэгчид ноогдох зар сурталчилгааны орлогын хувиар Facebook-ээс дутахааргүй амжилттай байсан боловч үргэлж алдагдалтай ажиллаж байсан Snap-ын ирээдүй хэрхэх нь одоогоор тодорхойгүй хэвээр байна.

Ямар ч байсан ашигтай ажилладаг болохын тулд хийсэн том алхам нь зорьж байснаар амжилттай болж чадлаа. Зах зээлийн үнэлгээ нь 34 тэрбум ам. доллартой тэнцэж үүсгэн байгуулагчид, анхны хөрөнгө оруулагчдаа долларын тэрбумтан, саятан болгосон компани одоо Ferrari, Twitter тэргүүтэй олон компаниас өндөр үнэлгээтэй болжээ.

Жишээлбэл Twitter-ийн зах зээлийн үнэлгээ одоо 11,20 тэрбум ам. доллартой тэнцэж байгаа бол 2015 онд Fiat Chrysler-ээс өрх тусгаарласан Ferrari-ийн үнэлгээ 12,46 тэрбум ам. доллартой тэнцэж байна.