Д.Дагвадорж осолд орсон залуугийн эмчилгээний зардлыг бүрэн даахаа мэдэгджээ

Энэ сарын 20-ны өдөр Булган аймгийн Рашаант сумын нутаг, Тээг толгой гэх газарт орон нутаг руу тоглолтоор явж байсан циркчид осолдож, гурав нь газар дээрээ амиа алдсан харамсалтай хэрэг гарсан билээ.

Холбогдох албаныхан хэргийн газарт үзлэг шалгалт хийж, циркчдийн сууж явсан машин хурд хэтрүүлсэн, “Дэйвү” маркийн хүнд даацын ачааны машины жолооч тээврийн хэрэгсэл нь эвдэрсэн үед замаа гүйцэд чөлөөлөөгүй, ослын зогсолтын тэмдгээ байрлуулж, урьдчилан сэргийлэх арга хэмжээ аваагүй зэргээс осол гарсныг тогтоогоод байгаа юм.

Их аварга Асашёорюү Д.Дагвадорж орон нутагт циркийн урлагаар үйлчлэх гэж яваад харамсалтайгаар амь насаа алдсан Монголын циркийн урлагийн авьяаслаг гурван жүжигчний ар гэрийнхэнд сэтгэлийн өргөл өргөж, хүнд гэмтэлтэй байгаа н.Гансүхийн эмчилгээний зардлыг бүрэн хариуцахаа мэдэгдсэн байна.