Э.Бат-Үүл, Д.Баттулга нарыг шүүхэд өгчээ

НИТХ-ын сонгуулийн 36-р тойрогт нэр дэвшигч, Нийслэлийн Засаг дарга бөгөөд УБ хотын
захирагч Э.Бат-Үүл, НИТХ-ын сонгуулийн 25-р тойрогт нэр дэвшигч, НИТХ-ын дарга
Д.Баттулга нар 2016-6- 16-ны өдөр хэвлэлийн бага хурал хийхдээ "Нийслэлийн өмнөх
удирдлагуудыг ГАЗРЫН МАФИ-ийнхан хэмээн гүтгэж, МАН-ыг эрх барих үед буюу
М.Энхболд, Т.Билэгт, Ц.Батбаяр, Г.Мөнхбаяр нарыг хотын даргаар ажиллах хугацаандаа
26.9 их наяд төгрөгийн хууль бус газар олголт хийсэн ч хотын төсөвт ямар ч мөнгө
ороогүй" хэмээн мэдэгдсэн. Энэ нь Сонгуулийн тухай хуулийн 70 дугаар зүйлийн 70.1.6-д
"Ээлжит сонгуулийн жил эхэлснээс хойш санал хурааж дуустал аливаа этгээд сонгогчдын
санал татах зорилгоор ... бусдыг гүтгэн доромжлох, гутаах, хуурамч мэдээ, мэдээллийг
төрөл бүрийн хэлбэрээр тараах"-ыг хориглосон заалтуудыг зөрчжээ.

Мөн Хүний эрхийн түгээмэл тунхаглалын 2.27-д "Хүн бүр эдийн болон сэтгэл зүйн
хохирлоо нөхөн төлүүлэх эрхтэй", Монгол Улсын Үндсэн хуулийн 16 дугаар зүйлийн 14
дэх хэсэгт "Монгол Улсын хууль, Олон улсын гэрээнд заасан эрх, эрх чөлөө нь зөрчигдсөн
гэж үзвэл уул эрхээ хамгаалуулахаар шүүхэд гомдол гаргах, бусдын хууль бусаар
учруулсан хохирлыг нөхөн төлүүлэх... эрхтэй", Иргэний хуулийн 511 дүгээр зүйлийн 511.1-
д "Бусдын нэр төр, алдар хүнд, ажил хэргийн нэр хүндийг гутаасан мэдээ тараасан этгээд
түүнийгээ бодит байдалд нийцэж байгааг нотолж чадахгүй бол эд хөрөнгийн хохирол
арилгасныг үл харгалзан, эдийн бус гэм хорыг мөнгөн болон бусад хэлбэрээр арилгах
үүрэг хүлээнэ.", мөн зүйлийн 511.2-д "...мэдээ тараасан уг хэлбэр болон бусад аргаар
няцаалт хийхийг гэм хор учруулсан этгээдэг үүрэг болгоно.." гэж заасан байдаг.

Иймд Э.Бат-Үүл, Д.Баттулга нарын зүгээс МАН, түүний удирдлагын нэр хүнд ажил хэргийн
нэр хүндэд халдсан худал мэдээлэл, гүтгэлгийг түгээсэн байх тул МАН-ын зөрчигдсөн эрх
ашиг, ажил хэргийн нэр хүндийг сэргээж, худал мэдээлэл тараасан этгээдээр, түгээсэн
хэлбэрээр нь залруулга хийлгэхийг хүсч Чингэлтэй дүүргийн Эрүүгийн хэргийн анхан
шатны шүүхэд, Чингэлтэй дүүргийн Иргэний хэргийн анхан шатны шүүхэд, Сүхбаатар
дүүргийн Цагдаагийн 1-р хэлтэст гомдол, нэхэмжлэл гаргажээ.

Эх сурвалж: Zaluu.com

Эх сурвалж: ЭХ СУРВАЛЖ: МАН-ын сонгуулийн штаб