Б.Баатархүү: Сонгуультай холбоотой худал мэдээлэл их байна

Сонгуулийн үйл ажиллагаатай холбоотой асуудлаар ирсэн гомдол мэдээллийн талаар Цагдаагийн Ерөнхий Газрын хэвлэл мэдээллийн төвөөс сэтгүүлчдэд мэдээлэл хийлээ.

-СОНГУУЛЬТАЙ ХОЛБООТОЙ 604 ГОМДОЛ ХҮЛЭЭН АВЧЭЭ- 

Цагдаагийн байгууллагаас Сонгуулийн тухай хуулийн 86.1, 87.11-д заасны дагуу нийт 17 аймагт Сонгуулийн саналын хуудас, Санал тоолох машиныг сонгуулийн хэсгийн хороонд хүргүүлэх үед хамгаалалтад ажиллан, санал авах байрыг хамгаалалтад авч ажиллажээ. Энэ хугацаанд саналын хуудас болон санал тоолох машин хүргэхтэй холбоотой зөрчил, дутагдал бүртгэгдээгүй байна.  Мөн 2016 оны тавдугаар сарын 20-ний өдрөөс 2016 оны зургаадугаар сарын 17-ний өдрийг хүртэлх хугацаанд ирүүлсэн “Сонгуулийн тухай хууль” зөрчсөн болон Сонгуулийн үйл ажиллагаатай холбоотой гэмт хэрэг, зөрчлийн 604 гомдол, мэдээлэл хүлээн авснаас Улаанбаатар хотод 362, хөдөө орон нутагт 242 бүртгэгдсэн байна.

Бүртгэгдсэн зөрчлийг утгаар нь ангилбал: 

• Сурталчилгааны самбар, зурагт хуудас, бусад эд зүйл гэмтээсэн 174 
• Нэр дэвшигчийг мэдээллийн хэрэгсэл, фэйсбүүк хуудас, Page хуудасаар гүтгэсэн, нэр төрийг нь гутаасан 76 
• Бэлэг сэлт, эд зүйл тараасан, дайллага, цайллага хийсэн 65 
• Ухуулга сурталчилгаа хийх үеэр саад учруулсан 23 
• Сурталчилгааны байр, намын байранд танхайрсан 30 
• Хууль зөрчин сонгуулийн сурталчилгаа явуулсан 153 
• Бусад 83 

Эдгээр зөрчлийн шийдвэрлэлтийн байдлыг шалгахад: 

• Эрүүгийн хэрэг үүсгэхээс татгалзсан: 16 буюу 2.6 % 
• Захиргааны арга хэмжээ тооцуулахаар шүүхэд шилжүүлсэн: 72 буюу 11.9%
• Захиргааны арга хэмжээ ногдуулсан:3 буюу 04 % 
• Зөрчил болох нь тогтоогдоогүй, хариу мэдэгдсэн: 37 буюу 6.1% 
• Газар дээр нь шийдвэрлэсэн: 11 буюу 1.8 %
• Ажиллагаанд байгаа: 469 буюу 77.6 хувь нь шалгагдаж байна. 

-ДУУДЛАГА МЭДЭЭЛЛЭЭ БУЦААХ ТОХИОЛДОЛ ИХ БАЙНА-

Хэвлэл мэдээллийн төвийн дарга Б.Баатархүү хэлэхдээ “Сонгуулийн сурталчилгаа эхэлснээс хойшхи гомдол, мэдээллийн 65 буюу 38 хувь нь сонгуульд нэр дэвшигчийн сурталчилгааны самбар, зурагт хуудас, ухуулах хуудас, бусад сурталчилгааны материалыг санаатайгаар болон хууль бусаар гэмтээх, устгах, бохирдуулсан гэх зөрчлүүд байна. Сурталчилгааны самбар, зурагт хуудас, ухуулах хуудас, бусад сурталчилгааны материалыг санаатайгаар болон хууль бусаар гэмтээх, устгах, бохирдуулсан гэх гомдол мэдээллийнх ихэнх нь эзэн холбогдогчгүй байх бөгөөд гурван удаагийн энэ төрлийн мэдээллийг хүүхдүүд үйлдсэн болохыг тогтоосон. 

Цагдаагийн байгууллагад өгсөн дуудлага мэдээллээ буцаах, гэр, майхан барих маргаан гаргах, дуудлага мэдээллийн дагуу цагдаагийн алба хаагч очиж шалгахад сурталчилгааны самбартаа санаа зовоод дуудлага өгсөн гэх, нэр дэвшигч болон менежер, ажилтнуудын үйл ажиллагаа хоорондын уялдаа холбоогүйгээс сурталчилгааны самбар, эд зүйлээ алдлаа гэх андуурсан дуудлага мэдээлэл өгөх зэрэг дуудлага мэдээллүүд гарсаар байна. 

Цаашид сонгуульд оролцож байгаа нам, эвсэл, бие даагч нар болон иргэд Сонгуулийн тухай хуулийг судалж хуулийн хүрээнд үйл ажиллагаа явуулахыг цагдаагийн байгууллагаас анхааруулж байна. Цагдаагийн байгууллага сонгуулийн үйл ажиллагаанд зөвхөн Сонгуулийн хуульд заасан чиг үүргийн дагуу хууль хэрэгжүүлэх үйл ажиллагаа явуулж байна” гэв.

Эх Сурвалж: Medee.mn