Монголын дипломатчид Украины хилээр хууль бус бараа нэвтрүүлэхийг завджээ

Өнгөрөгч бямба гариг буюу зургадугаар сарын 18-ны өдөр Украины хилийн “Дьяково” боомтын хилчид ОХУ-ын дипломат дугаартай Mercedes-Benz Vito маркийн автомашиныг саатуулжээ. Хилийн албаны дарга Олег Слободян хэлэхдээ “Уг машиныг хууль бус ачаа тээвэрлэж яваа тухай мэдээлэл бидэнд ирсэн. Албаны үнэрч нохой ч мөн уг машиныг сэжиглэж байгаа нь илт байсан. Тиймээс бид аюулгүй байдлын албаны мэргэжилтнүүдтэй хамт машинд нэмэлт үзлэг шалгалт хийхэд их хэмжээний тамхи гарч ирсэн” гэжээ.

Мөн энэхүү автомашинд манай улсын хоёр иргэн зорчиж явсан бөгөөд Украины хилчдийн мэдээллэж байгаагаар, уг машины зорчигчийн суудалд явсан хоёр иргэн Монгол улсын  дипломат пасспорт үзүүлсэн ба уг ачааг саадгүй нэвтрүүлэхийг хүссэн Москва дахь Монгол улсын элчин сайдын яамны албан бичиг үзүүлсэн аж.

Тус албан бичигт, зургадугаар сарын 29-нд болох Монгол улсын сонгуулийн ажлын техник хэрэгсэл байгаа хэмээн бичсэн байсан ч найман чемодан дүүрэн тамхи байсан хэмээжээ. Дээрх дипломат ачаанд Украины үйлдвэрийн Rothmans, Комплимент Винс, NZ, Lifa нэртэй нийт 29145 боодол тамхи байсныг хураан авч дипломат ажилчдад хэрэг үүсгэн шалгаж эхэлсэн байна. Шалгалтын явцад Монгол улсын хоёр иргэн мэдүүлэхдээ, Италийн Ром хотыг зорьж явсан хэмээжээ.

Дүрс бичлэгийг энд дарж үзнэ үү.

ЭХ СУРВАЛЖ : Medee.mn