Улааныг харж урвадаг, шарыг харж шарвадаг хоёр

Уг нь улстөр гээчийн халуун тогоонд орсон л бол улааныг үзэж урвадаггүй, шарыг үзэж шарвадаггүй өөрийн гэсэн үнэт зүйл, итгэл үнэмшилтэй баймаар. Гэтэл мань Ч.Улаан, Д.Тэрбишдагва хоёр яг тэгж “харагдаач”. Харин ч нэг улааныг үзэнгүүтээ урваж, шарыг харангуутаа сүүлээ шарваад ёстой нэг улстөр гээчийг муухай харагдуулж байгаа гэхэд болно.

Ядаж байхад хаа ч цуг явахыг нь яана. Өнгөрсөн 2012 оны сонгуулиар МАН-аас дуу шуугиантайхан гарч МАХН-ын Н.Энхбаяртай хүзүү сээрээрээ холбогдоод гишүүн болохын сацуу тус бүртээ сайдын албан тушаалд сууж, суучихаад дараагийн сонгууль болохоор МАН-аа чухам санасан гэж “улстөр”-ийн тоглолт хийх нь хэр зохимжтой бол.

Харин тэд энэ удаагийн сонгуульд МАН-аас нэр дэвших эрхээ баталгаажуулаад авсан бөгөөд Ч.Улааны хувьд Сүхбаатар аймгаас нэр дэвшихээр болжээ. Харин Д.Тэрбишдагвын хувьд Сонгино хайрхан дүүргээс нэр дэвших эрхээ баталгаажуулсан гэх. “Уулын бугыг хараад унасан морио хаядаг” энэ хоёр нөхөрт дахин итгэл үзүүлэх хэрэг ер нь байна уу. Өөрсөддөө ашигтай бүхэн рүү толгой хаялан алхдаг энэ мэт нөхдүүдээс уг нь салах цаг хэдийнэ болсон байлтай.

Э.Нашка