Ч.САЙХАНБИЛЭГ: АВАРГА АА ТА ЯМАР БӨХ АМАЛЖ БАЙГАА БИШ ДЭЭ

Сонгууль дөхөөд ч тэр үү гишүүдийн хувийн тоглолт дээд цэгтээ хүрч байна.  Өчигдөр гэхэд л сонгуулийн мандат, тойрог хуваарилах асуудал гишүүдийн хэрүүлийн алим шидэлцэх бай болов. Үнэхээр ч эрх барьж буй АН-ынхан зарим нэгэн тойрог, мандат дээр заль гаргасан нь тодорхой болсон. Харин МАН-ын гишүүд бухимдсаар юу ч хийж чадалгүй тус төсөл батлагдав. Тэгвэл өнөөдөр өглөө УИХ-ын чуулган хуралдах байсан ч гишүүдийн ирц хүрээгүйгээс хуралдсангүй. Гомдож орхисон МАН-ынхан хуралд суухгүй зөрүүдэлсэн бол, АН-ын гишүүдийн санаа сэтгэл сонгуулийн зүгт чиглэсэн учир ирц хүрээгүй юм. Дэмий л УИХ-ын дэд дарга Р.Гончигдорж хоолойгоо сөөтөл дуудсан ч ирээгүй.

Тэгвэл үдээс хойших Засгийн газрын хуралдаанаар Засгийн газраас малчдын талаар авсан арга хэмжээ болон малчны зээлийн хүүг бууруулж байгаа ажлын талаар мэдээлэл сонссон юм. Ингээд УИХ-ын гишүүн Б.Бат-Эрдэнэ гишүүн асуулт асуув. Тэрбээр “УИХ-ын гишүүний ирцийг бүрдүүлэх хэрэгтэй байна. Арав хүрэхгүй гишүүн сууж байна” гэж хэлмэгц нь УИХ-ын дэд дарга Р.Гончигдорж микрафоныг нь хааж орхив. Үүнд уурссан Б.Бат-Эрдэнэ гишүүн “Би яагаад шаардлага тавьж болдоггүй юм. Үгүй ээ энэ чинь ямар хэцүү ч юм бэ дээ” хэмээн халаглав. Тэрбээр цааш нь “Монгол улс тэр чигээрээ зээлийн барьцаатай. Бүх хүн зээлтэй. Энэ малчдын зээлийн хүүг бууруулах ажлаа тэнгэрт тултал ярих юм. “Нүглийн нүдийг гурилаар хуурна” гээч болж байна. Сая хонь Арабд гаргахаар боллоо гэсэн. Нэг ч хонь гаргаагүй. Ийм байдалтай молиго үмхүүлсэн зүйл ярихаа болимоор юм. Хонины нэхий 500 төгрөгт  хүрэхгүй байна. Бүх зүйлийг сайхан мэтээр харагдуулахаа боль” гэсэн юм.

Ерөнхий сайд түүний асуусан асуултад хариулах гэсэн боловч Б.Бат-Эрдэнэ гишүүн ихээр уурсаж, Н.Батбаяр гишүүнийг өөр дээрээ ирэхийг шаардав. Харин Ерөнхий сайд Ч.Сайханбилэг “Аварга хүн хүнийг хамаагүй дарамталж болох уу. Та ямар бөх амалж байгаа биш дээ. Н.Батбаяр гишүүн та хамаагүй битгий оч” хэмээн намын нөхрөө  хамгаалав. Ямартай ч үг хэлэх эрхээ боогдуулсан   Б.Бат-Эрдэнэ гишүүн уурсаж, цөхрөв бололтой.

У.САРАН