АТГ-ын даргын асуудлаар Ардчилсан нам завсарлага авлаа

Өчигдөр төрийн ордонд Хууль зүйн байнгын хороо цагаасаа хоцорч арай хийн ирцээ бүрдүүлэн хуралдаж эхэлсэн. Тус байнгын хороогоор АТГ-ын даргыг томилох асуудал яригдаж магадгүй байсан ч хууль зүйн байнгын хороогоор хэлэлцэх асуудлын дараалалд ороогүй байв. УИХ-ын гишүүн Ё.Отгонбаяр “Хууль зүйн байнгын хороо АТГ-ын даргын асуудлыг өнөөдөр хэлэлцэхгүй гэвэл хуулиа зөрчиж байгаа үйлдэл болох учраас би ирцээс өөрөө гарлаа. Хууль зөрчсөн үйлдэл хийхгүй хэмээн хатуухан хэлж картаа суглан хуралдааныг орхин гарсан.

Гэхдээ Хууль зүйн байнгын хороогоор эл асуудлыг хэлэлцэх эсэх дээр санал авахаар болж тэрээр эргэн хуралдаандаа суусан. Гэвч энэ асуудлын хүрээнд Ардчилсан намын бүлэг завсарлага авсан юм. Завсарлага авах болсон шалтгаанаа Ардчилсан намын бүлгийн дарга Б.Гарамгайбаатар “Ардчилсан намын бүлэг АТГ-ын даргыг томилох асуудлыг бүлгээр авч хэлэлцээгүй. Учир нь байнгын хорооны хэлэлцэх асуудлын дараалалд ороогүй байсан юм. Тиймээс судалж, танилцах үүднээс тав хоногийн завсарлага авах хүсэлт гаргаж байна” гэсэн юм.