ЦЕГ: Ямар нэгэн баривчилгаа байхгүй

Цагдаагийн ерөнхий газраас УИХ-ын гишүүн Х.Баттулгын асуудлаар мэдээлэл өглөө. 

ЦЕГ-ын хэвлэл мэдээллийн төвийн дарга, цагдаагийн дэд хурандаа Б.Баатархүү хэлэхдээ “Энэ шалгалт Женко Х.Баттулгатай холбоотой шалгалт биш. Ямар нэгэн баривчилгаа байхгүй. УИХ-ын гишүүд дотор байсан нь цаг үе нь тэгж таарсан байна. Шинэ төмөр зам төсөл, Сайншандын аж үйлдвэрийн цогцолбортой холбоотой хэргийг шалгах явцад “Баялгийн хувь” ХХК, “Түмэн хишигтэн” ХХК-ны санхүүгийн бичиг бичиг баримтад шалгалт хийх шаардлага гарсан.

Тиймээс "Баянгол" зочид буудалд байрлах дээрх компаниудын санхүүгийн өрөөнд Эрүүгийн байцаан шийтгэх хуулийн дагуу прокурорын зөвшөөрөлтэй нэгжлэг хийгдэж байна. УИХ-ын гишүүн Х.Баттулгын халдашгүй дархан байдалд халдсан ямар нэгэн үйл ажиллагаа явагдаагүй. Хэргийн газрын үзлэгийг саадгүй явуулах нөхцөлийг хангах үүднээс цагдаагийн алба хаагчдыг хамгаалалтад ажиллуулж байна.” гэлээ.