Сонгодог бүсгүй

Тэр бол “эрч хүч”-ийг мэдрүүлэгч залуу уран бүтээлч бүсгүй. Монголын сонгодог урлагийг хөгжүүлэхэд санаагаа чилээж, ихийг бүтээхээр зорьж нэгэн. 30 гаруйхан настай ч дэлхийн сонгодог бүтээлийг хийлээр дамжуулан хүмүүст хүргэхийн зэрэгцээ Хөгжим бүжгийн коллежийн маркетингийн менежер, залуу боловсон хүчнийг дэмжих зорилготой “Залуу удирдахуйн ухаан” төвийг удирдаж, “Интерконсалтинг” группийн бизнес хөгжлийн захирал зэрэг нэг биед ахадсан олон ажлыг амжуулдаг.

Анх зургаан настайгаасаа хөгжмийн ертөнцөд хөл тавьж, өөрийн гэсэн өнгө, орон зайг бий болгож чадсан О.Байгаль 2012 онд нэгдүгээр сар 27-нд “Сонгодог Эгшиглэн” симфони найрал хөгжимтэй тоглолтыг УДБЭТ-ийн тайзнаа тавьснаас хойш жил дараалан “The Best of Classics” VIP концертыг Сингапур, Хонг Конг зэрэг улс орнуудад тоглосоор ирсэн. 

Харин энэ удаад сонгодогийг амилуулагч бүсгүйг сонгодог урлагийн театрт ийнхүү гэрэл зургийн дурандаа буулгалаа.