Сонгууль дөхөөд бүгд солиорчхоогүй байгаа даа

С.Ганбаатар цас ухаж, Д.Ганбат цэрэг болж, Л.Эрдэнэчимэг бензээрээ гайхуулж, туулай агнаж, Л.Энх-Амгалан тэвэг тоглож, улс төрийн төдийгүй нийгмээ хөгжөөгөөд авсан.  “Монголоороо байгаасай” гэсэн клип хийж, дуулиан тарьсан Л.Гүндалай өөрийгөө “Бөөн дурын уран сайханч” гэж “өргөмжлөх” болсонбол Галзууруулагч хонь жилд эхэлсэн улстөрчдийн энэ мэт галзуу согтуу үйлдэл харин ч сонгууль ойртох тусам солиорлын дээд хэмжээнд хүрэх дэгээ.

“Эх орончдын өдөр”-т зориулж, нэгэн эмэгтэйгээс илгээсэн мэндчилгээ  жинхэнэ сюрприз болж чадлаа. Л.Амгалан гэх эмэгтэйн эл үйлдэл намынхаа гишүүдийн ясыг нь хавтайлгахад хүргэсэн гэнэ. Ядаж байхад гамин цэргийн малгайгаар гангарсныг хэлэх үү. Уг нь энэ өдөр гамин цэргийг Монголоос хөөсөн эх орончдынхоо гавъяаг Ардын намынхан дурсдаг. Гэтэл намынхаа төрсөн өдөр ийм бэлэг барьсан Л.Амгалан гишүүн МАН-ынхнаас багагүй шүүмжлэл, зэмлэл хүртээд байгаа бололтой. Яма сайндаа л тэгж их хөдөлмөр зүтгэл гаргасан клипээ устгаж байх билээ.

Энэ мэт ичих булчирхайгүй, үүх түүх, өмссөн, зүүснийхээ учрыг мэдэхгүй бөөн дурын уран сайханчдаасаа намууд болгоомжилж, ядахнаа урлагийн мэдрэмж тал дээр Л.Гүндалай шиг байхыг зөвлөсөн нь дээр болов уу. Ингэхгүй бол улс төрд горилж яваа бөөн, бөөн урансайханчдаас юу ч гарч, намаа яаж ч хорлох юм билээ.