“Орчлон” сургуулийн бассейнд живсэн дөрвөн настай хүү нас баржээ

"MCS" группийн албан ёсны салбар болох "Орчлон” цэцэрлэгт сурдаг  байсан дөрвөн настай хүү тус цогцолбор сургуулийн  бассейнд  живсний улмаас нас барсан харамсалтай хэрэг гарчээ.

Тодруулбал, өнгөрсөн арванхоёрдугаар сард “Орчлон” сургуулийн бассейнд талийгаач хүү живсэн байна. Улмаар Эх хүүхдийн эрүүл мэндийн үндэсний төвийн сэхээн амьдруулах тасагт эмчлүүлж байсан ч өнгөрсөн лхагва гаригт нас барсан байна. Хүү усанд живж удаан байсны улмаас тархи нь үхэжсэн байсан нь амиа алдахад шалтгаан болсон гэдгийг албан бус эх сурвалж мэдээлэв.

“Орчлон”  цогцолбор долоо хоногт нэг удаа хүүхдүүддээ усанд сэлэх хичээл ордог бөгөөд цагдаагийн байгууллага Ж.Оджаргалын эхнэр Д.Батмөнхийн удирддаг уг сургуулийн удирдлагыг шалган, эрүүгийн хэрэг үүсгээд буй аж.