Сурагч хүү цагдаад зодуулаад амиа алдав уу

Өвөрхангай аймгийн Арвайхээр хотын Ерөнхий боловсролын сургуулийн ахлах ангийн сурагч цагдаад зодуулж, амиа алдсан гэх мэдээлэл цацагдлаа. Эх сурвалжийн мэдээлж буйгаар энэ сарын 23-ны өдөр тус хотын нэгэн сургуулийн 11 дүгээр ангийн сурагч цагдаагийн байгууллагад дуудагдсаныхаа дараа удалгүй тархиндаа цус харваж нас барсан аж.

Тухайн өдөр хүү доод ангийнхаа хүүхэдтэй таагүй хандсан гэх асуудлаар аймгийн цагдаагийн газарт дуудагдсан байна. Ингээд орой нь сургууль дээрээ буцаж ирээд анги цэвэрлэх гэж байгаад ухаан алдаж, эмнэлэгт хүргэгджээ. Тэрээр эмнэлэгт хүргэгдэн ирсэн ч удалгүй нас барсан бөгөөд эмч нар түүнийг тархиндаа цус харвасан гэж оношилжээ.

 Эл хэрэгт талийгаач хүүгийн ар гэрийнхэн цагдаагийн алба хаагчдыг сэжиглэж байгаагаа хэвлэлд ярьжээ. Учир нь, хохирогч ангийнхаа хүүхдүүдэд цагдаад зодуулсан тухайгаа хэлээд удалгүй амьсгал хураасан аж.

Тиймээс бид энэ талаар Өвөрхангай аймгийн цагдаагийн газрын дарга хурандаа Б.Батзаяагаас тодрууллаа. Тэрээр “Буруу ташаа мэдээлэл гарсан байна лээ. Манай албан хаагчид энэ хэрэгт холбоогүй гэдэг нь бүх шатандаа нотлогдсон. Нотлох баримт, камерын бичлэг ч бас бидэнд байгаа. Тухайн сурагч гаднаас бэртэл авч цагдаагийн байгууллагад ирээд байцаагдсан тохиолдол болсон. Хэргийг шалгаж байгаа учраас илүү дэлгэрэнгүй мэдээлэл өгөх боломжгүй” гэв.

Эл хэрэгт эрүүгийн хэрэг үүсгэн, шалгаж байгаа юм байна.