Урлагийн ховорхон гэр бүл

Улсын драмын эрдмийн театраар овоглодог тайз, дэлгэцийн олон сайхан сэтгэлд шингэсэн дүрийг бүтээн ард олондоо хайрлагдсан урлагийн ховорхон гэр бүл бол Ардын жүжигчин П.Цэрэндавга гуайнх юм.

Тэрээр өдгөө ч тайзнаа уран бүтээлээ толилуулсаар байгаа бөгөөд хамгийн сүүлд гэхэд л энэ жил найруулагч Н.Наранбаатарын найруулгаар тайзнаа амилсан “Ромео Жульетта” жүжигт хотын даргын дүрийг бүтээн залуусын хамт тоглосон юм.

Түүний гэргий Ардын жүжигчин Д.Мэндбаярыг хэн хүнгүй бүтээсэн дүрээр нь андахгүй. Өдгөө их театртаа ажиллаж, уран бүтээлээ туурвисаар байгаа урлагийн гэр бүлийн хоёр маань саяхан болсон Монгол киноны 80 жилийн ойн арга хэмжээнд Ардын жүжигчин цол, тэмдгээрээ гоён ирцгээсэн юм. Тэд хоёулаа Ардын жүжигчин цолоор энгэрээ мялаасан урлагийн ховорхон гэр бүл юм.