Нэг тэрбумын даашинзыг хэн тайзнаа амилуулах вэ

Өнгөрсөн тавдугаар сард “Asian Fashion Festival”-д оролцон Гранпри шагналын эзэн болсон дизайнер Д.Отгонжаргал тун удахгүй өөрийн шинэ загварын шоуг хийхээр товоо зарласан билээ.

Тэрээр өнгөрсөн жил өөрийн бие даасан “O Couture” загварын товчоогоо үүсгэн байгуулж гоёлын даашинзын коллекциороо ийнхүү Азид тэргүүлсэн юм. “O Couture-2015 fashion show”-гаа амжилттай зохион байгуулсан тэрээр энэ жил дахин “O Couture-2016 high fashion show” хийхээр бэлтгэл ажилдаа орсон аж.

Түүний энэхүү шоуг дээдсийн хүрээнийхнийг хүсэн хүлээдэг болсон юм. Тэр ч утгаараа тэрээр загварын шоундаа олон гэнэтийн бэлгүүдээ дэлгэхээр зэхсэн сурагтай. Сүүлийн үед томоохон загварын шоуг өнжих болсон тэрээр нэг тэрбум төгрөгийн үнэтэй гоёлын даашинз урлаад завгүй байгаа талаар бор шувуу нисэх болсон юм. Энэ нь ч үнэний ортой гэнэ. Тэрээр Азийн загварын шоунд гранпри хүртэн Азийн дээдсийн хүрээнийхний гоёлыг урлаад эхэлсэн гэнэ. Нэг тэрбумын даашинзыг тэрээр  Хонг Конгийн тэрбумтны өв залгамжлагч найз бүсгүйнхээ захиалгаар урлаж байгаа гэнэ. Нэг тэрбумын үнэтэй даашинз ямар байх бол оо. Өөрийн эрхгүй харахсан гэдэг бодол төрж байна шүү.  Энэхүү даашинзын талаар сураг тавихад дизайнер Д.Отгонжаргал ирэх арванхоёрдугаар сарын 3-нд болох “O Couture-2016 high fashion show”-н дэлгэн үзүүлэхээр төлөвлөж байгаа гэнэ шүү.

Гэхдээ энэхүү гайхалтай даашинзыг тайзнаа амилуулах сонгон шалгаруулалт болсон бөгөөд топ модель Одгэрэл тэрхүү шалгуурыг нь давсан сурагтай. Юутай ч тайзнаа нэг тэрбум төгрөгийн даашинз олны хүртээл болох нь ээ.