Залуу дуучин Г.Мөнх-Амьдрал: Би их баяртай байна

Булган нутгаас өнөө цагийн нийтийн дууны урлагт мэндэлсэн залуу дуучин Г.Мөнх-Амьдрал хос цомгийнхоо нээлтийг “Наран туул” худалдааны төвд хийлээ. Зүрхний дуулал, Хайрын цас дуунуудаараа хүч түрэн гарч ирсэн залуу дуучин маань спортод нэлээдгүй амжилт үзүүлсэн гэдгээр нь түмэн олон андахгүй бизээ. Тэрээр тэшүүрийн спортоор өсвөр наснаасаа хичээллэж ирсэн бөгөөд Үндэсний шигшээ баг, Алдар спорт хорооны тамирчин тэшүүрийн спортын ОУХМ цолтой. Мөн Монгол улсын рекорд амжилтыг 35 удаа шинэчлэн тогтоосон хүн төрлөхтөний их наадам өвлийн Олимпын наадмаас бусад бүх тэшүүрийн олон улсын тэмцээнд Монгол улсын нэрийн өмнөөс оролцож “шорт-трек”-ийн төрөлд олон улсын тэмцээний анхны медалийг эх орондоо авчирч байсан юм.

Түүний энэ амжилтуудыг үнэлж 2013 онд “Биеийн тамирын тэргүүний ажилтан” цол тэмдгээр шагнасан. Түүнчлэн 2015 онд өөрийн нэрэмжит тэшүүрийн тэмцээнээс “Алтан гадас” одонгоор шагнагдсан байна. Энэ их амжилтыг үзүүлсэн спортлог залуу уран бүтээлч Г.Мөнх-Амьдрал дуулах хүсэл тэмүүлэлдээ хөтлөгдөж тэшүүрийн спортоо орхисон нь спорт сонирхогч дэмжигчдын дунд нэлээдгүй шуугиан тариад авсан гэдэг. Өдгөө нийтийн дууны урлагт шинэ өнгө, хөг ая нэмэхээр эргэж буцалтгүй уран бүтээлдээ ханцуй шамлан ороод байгаа юм. Тэрээр өчигдөр “Наран туул” зах дээр “Зүрхний дуулал”, “Нутгаа зорьно” нэртэй цомгийнхоо нээлтийг хийж цомог тус бүрээс 150-ыг танилцуулгынхаа хамт үнэгүй тараасан байна.

Түүний цомгийн нээлтийг маш олон хүмүүс сэтгэл хангалуун хүлээн авсан бөгөөд цомог нь эрэлт ихтэй худалдаалагдаж авах хүсэлтэй хүмүүсийн дунд эмх замбараагүй байдал үүсч дуучин залууг багагүй сандаргаад авсан гэнэ шүү. Тэрээр хос цомгийн нээлтэнд хүрэлцэн ирсэн олон түмэндээ талархаж буйгаа илэрхийлэхийн сацуу би их баяртай байна хэмээн өөрийн цахим хуудаснаа бичжээ. Мөн залуу уран бүтээлч, дуучин залууг Булган нутгийн томчууд маш их дэмждэг гэсэн шүү. Ямартай ч шинэ залуу дуучин Г.Мөнх-Амьдралд цаашдын уран бүтээлд нь өндөр амжилт хүсье.