Т.Цогтыг ч бас охиныхоо аминд хүрсэн гэж буруутгаж байна

Баянзүрх, Сүхбаатар, Чингэлтэй дүүргийн шүүхэд дөрвөн настай охиныхоо аминд хүрсэн хэрэгт буруутгагдаж буй Т.Цогт, Г.Маралмаа нарт холбогдох шүүх хурал өнөөдөр 10.00 цагт болно. Энэ сарын 17-нд шүүх хурал болсон ч шүүгдэгч Г.Маралмаагийн өмгөөлөгч М.Хувцагаан болон зарим гэрчүүд ирээгүй учраас шүүх бүрэлдэхүүн хуралдааныг энэ сарын 24-ны 10.00 цаг хүртэл хойшлуулсан юм.

Уг хэргийн шүүх хурал өнгөрсөн зургаадугаар сард болсон бөгөөд шүүх бүрэлдэхүүн хэргийг нэмэлт мөрдөн байцаалтад буцаасан. Тухайн үед Улсын яллагчийн зүгээс Т.Цогтод Эрүүгийн хуулийн 107.3, 246.1-т зааснаар 5 жил хорих ялын дүгнэлт үйлээд байсан юм. Тодруулбал, түүнийг охины амь нас аюултай байдалд байхад тусламж үзүүлээгүй, гэмт хэргийг мэдсээр байж зохих байгууллагад мэдээлээгүй гэх хэрэгт буруутгаж байсан.  

Харин хойд эх 27 настай Г.Маралмааг хүний амийг биеэ хамгаалж чадахгүй байгааг нь мэдсээр байж /Эрүүгийн хууль, 91.2.12/, онц хэрцгий аргаар /91.2.15/ хөнөөсөн хэрэгт буруутгаж байгаа бөгөөд түүний гэмт буруутай нь тогтоогдвол 15-25 жилийн хорих ялаар шийтгэх заалттай.

Тэгвэл нэмэлт мөрдөн байцаалтаар Т.Цогтын зүйл ангийг нь өөрчилж, охиныхоо амь насыг санаатайгаар хохироосон хэрэгт буруутган Эрүүгийн хуулийн тусгай ангийн 91.2.11, 91.2.12, 91.2.15 гэсэн зүйл ангиар прокуророос яллах дүгнэлт үйлдэн шүүхэд шилжүүлжээ.

Хэрвээ түүний гэм буруутайг шүүх тогтоовол 10-15 жил хүртэл хугацаагаар хорих ялаар шийтгэх юм байна.