Дуучин Ч.Ану мисс бүсгүйчүүдийг байлдан дагуулж байна

“Гала” хамтлагаар овоглох болсон цагаасаа эхлэн олны анхаарлын төвд байж, сайн, муугаараа хэлүүлж сурсан дуучин Ч.Ану анхны үрээ өлгийдөн авмагцаа “хэл амнаас айж байна, зодог тайллаа” хэмээн тунирхсан билээ. Тэрбээр урлагийн тайзнаа гарахаа больсон ч цахим ертөнцийн “тайз”-н дээр тун ч идэвхтэй байгаа. Өдөр бүр идсэн уусан, өмссөн зүүсэн, хэрэглэсэн, ашигласан бүхнээ эчнээ танилууддаа танилцуулдаг “тогтмол ажилтай”.

Дуучин бүсгүй сүүлийн үед тураах цай хилийн чанадаас оруулан ирж, охид бүсгүйчүүддээ гоо сайхныг бэлэглэхээр тун ч идэвхтэй ажиллаж буй. Тэгвэл тэрбээр энэхүү гоолиг сайхан биений нууц болсон цайгаараа мисс, модель бүсгүйчүүдийг хүртэл байлдан дагуулж эхэлжээ. Тодруулбал, мисс Т.Батцэцэг, Б.Төгс-Амгалан, Б.Гэрэлчулуун, топ модель О.Уянга, загвар өмсөгч Чамиа нар аль хэдийнэ дуучин бүсгүйн тураах “аян”-д нэгдсэн байна. Тэгэхээр бүхнийг байлдан дагуулагч Ч.Ану төгс гоолиг биетэй бүсгүйчүүдийг ч бас “тураах” нь дээ.