Явган хүний замыг чөлөөлнө

Нийслэл хотод хөдөлгөөний аюулгүй байдлыг сахихад хүндрэл учруулсан зам харгуй цөөнгүй. Тэр дундаа явган хүн зорчих зам гаргалгүй автозамд тулгаж байшин барилга барьж, хашаа хороо татсанаас хүүхэд хөгшид төдийгүй томчууд ч аваар осолд өртчих гээд байдаг аюултай газрууд олон бий. Тиймээс НИТХ-аас явган хүний замыг чөлөөлөх шийдвэр гаргаад удаж байна. Харамсалтай нь энэ ажил биеллээ олсон нь цөөн.

Тэгвэл өнөөдөр олон жилийн турш, өдөр бүр зуу зуун хүний амь нас, эрүүл мэндийг эрсдэлд оруулж байсан нэгэн замыг чөлөөлөхөөр болжээ. Гандангийн уулзвараас МҮОНРТ хүртэлх зам дагуу автозамд тулгаж барьсан хашааг багасгаж, явган хүний зам барих газрыг чөлөөлнө гэж Улаанбаатар нэгтгэлээс манайд мэдээллээ.

 Авто замд тулган газрын зөвшөөрөл авсан айл хашаагаа хоёр метрээр багасгаж татахаар болжээ. Ингэснээр тэр хэсэг газарт  явган хүний зам тавих боломжтой болж байгаа юм. Энэ мэт ойлголцол, шийдлээ хүлээсэн газрууд цөөнгүй байгаа бөгөөд иргэд энэ айл шиг асуудалд нааштай, уян хатан хандана гэдэгт итгэж байгаагаа Улаанбаатар нэгтгэлийнхэн илэрхийлж байлаа.