Навчаагийн үйлдэл олны дургүйг хүргэв

Сүүлийн үед гадаад төрхөөрөө ч, шаргуу хөдөлмөрч зангаараа ч цахим ертөнцийн од болоод буй жүжигчин Б.Навчаа тун увайгүй зантай нэгэн гэдгээ олонд харууллаа.

Тэрбээр “21 000” реалити шоунд оролцож байгаа билээ. Тэгвэл хэрхэн арвич хямгач нэгэн гэдгээ харуулах учиртай энэхүү нэвтрүүлгээ тэрбээр “заль”-иар эхлүүлэв. Тодруулбал, жүжигчин бүсгүй “Оргил” худалдааны төвөөс бараг 30 мянгөн төгрөгийн жимсийг 500 төгрөгөөр авч “сэргэлэн зангаа хэтрүүлж ашиглав”. Ингэхдээ тэрбээр “Би танай алтан хэрэглэгч” гэж худалдагч бүсгүйг “найрсан” юм.

Гэхдээ энэ нь сэргэлэн гэхээсээ илүү олны танил төрхөө ашиглаж “зальдсан” хэрэг гэж олон хүн үзэж байна. Учир нь, Б.Навчаа хатагтай өөрөө хоосон хонохгүй байхаа л бодсноос бус өглөөнөөс орой хүртэл ажиллаж, амьдралдаа дөнгөн данган хүрэх цалин авдаг худалдагч бүсгүйг огтхон ч өрөвдсөнгүй.

“Жүжигчин Б.Навчаа авсан” гээд дэлгүүрийн эзэд үнэгүй бэлэглэхгүй, худалдагч бүсгүй л тэрхүү жимсний мөнгийг төлнө гэдгийг бодоод олчих зэргийн ухаан уг нь жүжигчин бүсгүйд баймаар л юм.