Ц.Мянганбаярт ял оноожээ

“Монгол газар” компанийн захирал Ц.Мянганбаярын тусгай хамгаалалттай газарт хууль бусаар ашигт малтмал ашиглах, олборлож байгаль орчныг сүйтгэсэн гэх хэргийг өнгөрсөн долоо хоногийн баасан гаригт шүүхээр хянаж, түүнд ял оноожээ.

Дүүргийн эрүүгийн хэргийн анхан шатны II шүүхэд энэхүү хэргийг хянаад Ц.Мянганбаярт Эрүүгийн хуулийн тусгай ангийн 214 дүгээр зүйлийн 214.2 т зааснаар нэг сая төгрөгийн эд хөрөнгө хурааж, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх хэмжээний буюу 19.200 сая төгрөгийн торгуулийн ял оногдуулсан байна.

Ц.Мянганбаярын үйлдсэн гэх хэргийг сөхвөл,

Ц.Мянганбаяр нь 2013 оны наймдугаар сараас аравдугаар сарын 14-ний өдрийг хүртэлх хугацаанд Өвөрхангай аймгийн  Уянга сумын VI багийн нутаг дэвсгэрт орших Бөөрөлжүүт гэх орон нутгийн тусгай хамгаалалттай газарт хууль бусаар ашигт малтмал ашиглах, олборлох үйл ажиллагааг гардан зохион байгуулсан. Улмаар байгаль орчинд нийт 378 сая төгрөгийн онц их хэмжээний хохирол учруулсан болохыг прокурорын байгууллагаас тогтоосон юм.