Д.Амарсайхан нас барсан хэргийг цагдаагийнхан шалгаж эхэллээ

ШШГЕГ-­ын харьяа Цагдан хорих 461 дүгээр ангид хоригдож байхдаа нас барсан Газрын тосны газрын дарга асан Д.Амарсайханы үхэлтэй холбоотойгоор хууль хяналтын байгуул­лагаас эрүүгийн хэрэг үүсгэн шалгаж байна. Энэ тухай Улсын ерөнхий прокурорын газрын Хэвлэл мэдээлэл, олон нийттэй харилцах албанаас “Цагдан хорих төвд хоригдож байсан Д.Амарсайхан 2014 оны тавдугаар сарын 13­ нд нас барсан асуудалд Баянгол дүүргийн цагдаагийн II хэлтсээс Эрүүгийн хуулийн 95 дугаар зүйлийн 95.1 дэх хэсэгт заасан бусдыг амиа хорлоход хүргэсэн гэсэн үндэслэлээр эрүүгийн хэрэг үүсгэн шалгаж эхэлсэн. Хэрэгт Дүүргийн хоёрдугаар прокурорын газраас хяналт тавьж байна” гэж мэдээлэв. Одоогоор энэ хэрэгт хууль хяналтын байгууллагаас хэн нэгнийг буруутгаж, сэжигтэн яллагдагчаар татаагүй байгаа гэнэ.