Магтан матагч

УИХ-ын гишүүн О.Баасанхүүг магтан матагч хэмээн намынхан нь нэрлэх болсон гэнэ. Саяхны нэгэн сонинд өгсөн ярилцлагадаа намын дэд дарга Д.Тэрбишдавгыг гурван давхар дээлэндээ түүртэж явааг нь шүүмжлэхдээ магтахын завсар матсан нь дээрх хочийг зүүхэд хүргэсэн бололтой. “Тэрбишдавга  дарга  УИХ-ын гишүүн, Шадар сайд, МАХН-ын дэд дарга гээд гурван давхар дээлэндээ түүртэж байна. Хөөрхий шөнө оройдоо гэртээ харьдаг гэсэн. Би даргыгаа шүүмжлэх гээгүй. Харин маш их ачаалалтай ажиллаж байгааг нь хэлэх гэсэн юм” хэмээн ярьсан нь гишүүн хэлэх гэж хэлэв үү, “хийх” гэж хэлэв үү гэдэг асуултыг тэмдэг үлдээгээд буй. Түүнчлэн намын дарга Н.Энхбаяр нь түүнийг гишүүн болоход “За гишүүн боллоо гээд хүнээс мөнгө авч болохгүй. Мөнгө аваагүй цагт тэр хүн чиний боол байна. Мөнгийг нь авчихвал чи боол болно” гэж зөвлөгөө өгсөн талаар ам алдсан нь даргыгаа эвгүй байдалд оруулаад авсан сурагтай. Тиймээс намынхан нь түүнтэй ярихаас эмээж, дараа нь матан матуулахад хүрэх вий хэмээн болгоомжлох болсон гэнэ лээ.