“PEACE AWARD 2013” ёслолын ажиллагааны шагналын эзнээр Ц.Нямдорж тодорлоо

Дэлхийн энх амгалан, Монгол Улсын нийгмийн салбарын сайн сайхны төлөө мэдлэг, авьяас чадвар, хичээл зүтгэлээрээ ихийг хийж бүтээсэн эрхмийг тодруулан алдаршуулах  “PEACE AWARD 2013” ёслолын ажиллагаа өчигдөр Чингис зочид буудалд боллоо. “Дэлхийн Энхийн Их Наадам” ТББ, Дэлхийн Монголчуудын чуулган, Дэлхийн Энхтайвны зөвлөл, Монголын Уламжлалын академи хамтран гурав дахь жилдээ зохион байгуулсан юм. Энэ шагнал Монголын энхтайвны хөдөлгөөн, энхтайвны байгууллагуудын нэгдмэл үнэлэмжийг  илэрхийлсэн хамгийн дээд шагналд тооцогддог. Үндэсний хэмжээнд үйл ажиллагаа явуулж буй төрийн болон төрийн бус, олон нийтийн байгууллага, эрдэм шинжилгээ, боловсролын байгууллага, хувь хүний төлөөллөөс “Энхийн шагналтан”-ыг тодруулдаг аж. Энэ жилийн “Энхийн шагнал”-ын эзнээр УИХ-ын гишүүн Ц.Нямдорж тодорсон юм.

 

Тэрээр хэлсэн үгэндээ“Миний бие Монгол улсын төрд 23 жил зүтгэсэн байна. Энэ хугацаанд хулгай, худлаас хол байж чадсан. Энэхүү шагналыг би Монголын төрд үзүүлж байгаа хүндэтгэл гэж бодож байна. Цаашлаад цагдаа, хил, хуулийнхны хичээл зүтгэлийн үнэлгээ гэж ойлгож байна. Сирид болж байгаа эмгэнэлт явдал, Украйнд саяхан эхэлсэн бослого зэргийг хараад Монгол улсыг ийм болгочихгүй юмсан гэж байнга бодож явдаг. Монголын төр ард иргэддээ хал багатай, нямбай чанд байж чадвал улсын дайтай улс байж чадах болно” гэсэн юм.

Энэхүү шагналын анхны эзнээр 2011 онд Монгол Улсын Онц бөгөөд бүрэн Эрхт Элчин сайд, СГЗ Д. Цахилгаан, удаах шагналыг Төрийн соёрхолт, Ардын уран зохиолч Б.Лхагвасүрэн 2012 онд хүртсэн юм.