Ц.Мөнхбаярт 21,6 жилийн хорих ял оноов

Төрийн хамгаалалттай хэд хэдэн газарт тэсрэх бөмбөг байрлуулсан, төрийн албан хаагчийн өөдөөс галт зэвсэг ашигласан, иргэдийг заналхийлсэн “Гал үндэстэн” холбооны тэргүүн Ц.Мөнхбаяр нарыг Цагдан хорих 461 дүгээр ангид шүүж, Дүүргийн эрүүгийн хэргийн анхан шатны шүүхээс тэдэнд ял оноолоо. 

Тодруулбал, хоёр өдөр үргэлжилсэн шүүх хурлын шийдвэр өчигдөр орой гарч, Ц.Мөнхбаяр, Г.Болдбаатар, Д.Төмөрбаатар, Ж.Ганболд нарт 21.6 жилийн хорих ял, М.Мөнхболдод хоёр жилийн хорих ял тус тус оноосон байна. Харин О.Самбууёндон, Б.Гантулга нарыг гэм буруугүйд тооцож, цагаатгасан байна. 

“Прокуророос Ц.Мөнхбаяр нарт 22 жилийн хорих ял төлөвлөсөн байсан. Тэгээд шүүхээс тэдний саатуулагдсан хугацааг хасч тооцон 21.6 жилийн хорих ял оноосон. Нийт найман хүнийг дөрвөн өмгөөлөгч өмгөөлсөн байгаа. Бид Дүүргийн эрүүгийн хэргийн анхан шатны шүүхийн шийдвэрийг хүлээн зөвшөөрөхгүй байгаа тул давж заалдах шатны шүүхэд хандана” гэж Гол нууруудын нэгдсэн холбооны зохицуулагч н.Цэрэнханд мэдээллээ.