АТГ Ж.Энхбаяр гишүүний “Алтайн хүдэр”-ээс авсан 450 сая төгрөгийг шалгана

УИХ-ын гишүүн, Батлан хамгаалахын сайд асан Ж.Энхбаярын “Алтайн хүдэр” компаниас хандив нэрээр авсан 450 сая төгрөгийн асуудлыг АТГ-т шалгуулахаар боллоо. Тэрбээр “Алтайн эрин” ТББ-ыг үүсгэн байгуулагч бөгөөд “Алтайн хүдэр” компаниас хандив нэрээр 450 сая төгрөг авсан баримтыг манай сайт анх дэлгэсэн юм. Энэ баримтыг эргэн сануулбал, Говь Алтай аймгийн Цээл сумын нутагт төмрийн хүдрийн орд эзэмшдэг “Алтайн хүдэр” компани аймаг, сум орон нутгийн төрийн байгууллага болон эрх мэдэлтнүүдэд хандив нэрээр олон зуун сая төгрөгийг жил бүр өгдөг байсан. 2008-2012 оны баримтаас харахад тэд жилд дунджаар 73-365 сая төгрөгийг байгууллага, хувь хүнд хандив нэрээр өгсөн нь нутаг орныг хөгжүүлэх хандив туслалцаа гэхээсээ илүү авилга хээх хахуулийн нууц өнгөлөн далдалт байж болзошгүй байсан юм. Тухайлбал, УИХ-ын гишүүн Ж.Энхбаярын үүсгэн санаачилсан “Алтайн эрин” ТББ-д гэхэд энэ хандивынхаа бараг тал хувийг буюу хагас тэрбум орчим төгрөгийг зориулсан бөгөөд тайлангаас харвал 2010 онд 50 сая төгрөг, 2011 онд зургаан удаагийн үйлдлээр нийт 400 сая төгрөг буюу хоёрхон жилийн хугацаанд нийт 450 сая төгрөгийг “Алтайн эрин” ТББ-д хандивласан юм.