Э.Бадар-Ууган аваргын төрсөн өдөр

Бээжингийн олимпийн баатрууд зургадугаар сарын эхний энэ өдрүүдэд төрсөн байдаг. Найдангийн Түвшинбаяр аварга зургадугаар сарын 1-нд төрсөн бол “Бээжин 2008” паралимпийн аварга Д.Баатаржавын төрсөн өчигдөр тохиожээ.

Харин өнөөдөр Бээжингийн олимпийн аварга Энхбатын Бадар-Ууган аваргын мэндэлсэн өдөр.

Аварга Э.Бадар-Ууган бэртлийн улмаас хэсэг хугацаанд бэлтгэл сургуулилтаа орхиж, Лондонгийн олимпийг өнжсөн ч эмчилгээний эхний шатууд амжилттай болж, сүүлийн саруудад хөнгөн бэлтгэл хийж эхэлжээ. Гэхдээ тив дэлхийн спортын тавцанд Монголын ширэн бээлийтнүүдийн амжилтыг олонтаа дуурсгасан, 2008 оны Дэлхийн шилдэг боксчин Э.Бадар-Ууган баатар өнгөрсөн хугацаанд их спортоосоо сэтгэл зүрхээ холдуулаагүй.

Тэрээр Бээжингийн олимпийн дараа спортын салбарынхнаа дэмжихээр “Амжилтын төлөө хамтдаа” ТББ байгуулсан бол өнгөрсөн жилээс МЗХ-ны дэргэдэх залуучуудын Спорт хороог удирдахын сацуу Монгол Улсын Ерөнхийлөгчийн Спортын зөвлөх, Монголын боксын холбоондоо Тэргүүн дэд ерөнхийлөгчөөр ажиллаж байна. 

• 2008 онд Олимпод анх удаагаа оролцож, Монголын түүхэнд анх удаа боксын төрлөөр Олимпийн алтан медаль хүртсэн.

• 2007 онд Чикаго хотод болсон Дэлхийн аварга шалгаруулах тэмцээнээс мөнгөн медаль хүртсэн.

• 2007 оны Ази тивийн аварга.

• 2007 оны Улсын аварга.

• 2006 оны Оюутны дэлхийн аварга.

• Герман улсад болдог “Химийн цом” тэмцээний аварга.

• 2006 Азийн наадмаас хүрэл медаль хүртсэн.

• 2007, 2008 оны Монголын шилдэг тамирчин.

• 2008 оны Дэлхийн шилдэг эрэгтэй боксчин.