АНУ БНСУ-руу “F-22” сөнөөгч онгоцнууд илгээжээ

Солонгосын хойгт өнгөрсөн бямба гаригаас хойш дайны цэрэгжилтийн бэлэн байдал зарлагдаж, байдал эгзэгтэй болсон энэ үед АНУ-ын зүгээс БНСУ-тай хамтран хийж буй “Foal Eagle” цэргийн сургуулилтанд дахин үл үзэгдэх технологиор бүтээсэн “F-22” сөнөөгч онгоцнуудыг илгээсэн тухай “CBS” мэдээлжээ. 

Үүнээс өмнө өнгөрсөн пүрэв гаригт АНУ Өмнөд Солонгостой хийж буй цэргийн сургуулилтанд үл үзэгдэгч “B-2” бөмбөгдөгчөөр зэвсэг тээвэрлэсэн. Харин үүнээс хоёр хоногийн дараа Хойд Солонгосын зүгээс БНСУ болон АНУ-ын эсрэг дайны цэрэгжилтийн бэлэн байдал зарлаж, хоёр орны хилийн бүсэд ямар нэгэн зэвсэгт өдөөн хатгалга нь шууд томоохон хэмжээний тулаан буюу цөмийн дайнд хүргэхийг хатуу анааруулаад буй юм. 

АНУ-ын армиас хийсэн мэдээллээр Америк  “F-22” сөнөөгч онгоцнуудыг Япон улсаар дамжуулан Өмнөд Солонгос улс руу нэвтрүүлжээ.