Хүүгээ зодсон хойд эцэгт 5.6 жилийн оноожээ

Зайрмагны 300 төгрөг хэлэлгүй авсан хэрэгт буруутган долоон настай хүүгээ харгисаар зодсон хойд эцгийн тухай дуулиан өнгөрсөн оны арванхоёрдугаар сард олныг цочроосон. Хохирогч хүүгийн хойд эцэг болох Г.Түмэнжаргалыг өчигдөр Сонгинохайрхан дүүргийн шүүхэд хаалттай шүүж, жирийн дэглэмтэй хорих ангид 5.6 жил ял эдлүүлэх шийтгэл оногдуулжээ. 

Г.Түмэнжаргал нь дагавар хүүгээ гурван цагийн турш зодож, хоёр гарын ясыг нь цуулж, толгойг нь хагалан, бүхий л биеийг нь хөх няц болтол нь зодсон юм. Хүүг зодож байх үед нь ээж нь хамт байсан бөгөөд хөрш эмэгтэй нь цагдаагийн байгууллагад хандсанаар хүүг аварсан юм. Аавдаа зодуулсан хүү одоо ээж, эмээгийнхээ халамжид очоод байгаа. Шүүх эмнэлгийн дүгнэлтээр хүүгийн толгой, гар, нуруу, дал, хөлд гэмтэл учирсан нь шинжээч эмч болон бусад нотлох баримтаар нотлогдсон юм.