14-хөн настай бяцхан охин Эх орныхоо төлөө зулын гол боллоо

Газар нутаг, эрх чөлөөгөө алдаж, Хятадын түвд гэсэн статусыг үл хүлээн зөвшөөрөх тэд их гүрний харгислалын өмнө хүчин мөхөсдөхдөө бусад улс орноос аврал эрж, тэдний сонорт өөрсдийн өнөөгийн байдлыг хүргэх гэсэндээ алтан амиа ийн хэдэн арваараа золиослох эмгэнэлт замыг сонгож, дэлхий дахиныг сэртхийлгэж байна.

Өдгөө Түвдийн 70 лам хуврагууд өөрсдийн амийг егүүтгэхээр зулын гол болсоноос 60 гаруй амиа алдаж, үлдсэн хэд нь тахир дутуу болсон байна. Саяхан гэхэд 14-хөн настай бяцхан охин эх орныхоо төлөө зулын гол болж, дэлхий нийтийг цочирдуулаад байна.

Тодруулбал Энэтхэгийн Дарамсала хотод 14 настай ахлах сургуулийн сурагч, түвд охин эх орныхоо тусгаар тогтнол, эрх чөлөөний төлөө зулын гол боллоо. Бяцхан охины инээмсэглэн авахуулсан зургийн хажууд, түүнийг хэрхэн халуун галд тарчлан амиа өргөснийг харуулсан зургийг бусад зулын гол болсон хүмүүсийн гэрэл зурагтай самбаруудад мөнхөлж Дарамсала хотноо байрлах Далай ламын хийд рүү хүрэх замын хажуугаар эгнүүлэн тавьжээ.

Тэдний гэгээн дурсгалыг хүндэтгэхийн зэрэгцээ хагас зууны тэртээ алдагдсан тусгаар тогтнол, эрх чөлөөгөө олж авахаар тэмцэж буй түвдүүд лаа асааж, түвдийн туг, Далай ламынхаа зургийг барин “Free Tibet” хэмээн уриалан жагссаар байна.