Авлигын хэргээр ял эдэлсэн Д.Сүндийгийн эхнэр Н.Ундрах нэр дэвшинэ

“Нэткапитал” ББСБ-ын ТУЗ-ийн дарга Д.Сүндий гэр бүлийн хүчирхийлэл үйлддэг тухай шүгэл үлээж, олонд танигдсан, түүний эхнэр Н.Ундрах АН-аас нэр дэвшихээр зэхэж байгаа бололтой. Ингэхдээ бүр АН-ын жагсаалтад орохоор яриа хийж байгаа аж.
Боловсрол, мэдлэгтэй Н.Ундрахын хувьд хүчирхийллийн хохирогч болоод зогсохгүй хамтдаа бүтээсэн амьдрал нь орвонгоороо эргэж, хамаг хөрөнгөө Д.Сүндий болон түүний ойрын хүрээнийхэнд алдаж, өмссөн хувцастайгаа орох орон, очих газар болчихсон тухайгаа цахим орчинд цацаж байсан нь саяхан.

 
Харин энэ удаа тэд эвлэрч нэгдэв үү эс бөгөөс хэн нэгэн нь заавал УИХ-ын гишүүн болох зайлшгүй шаардлагатай болохоор зүтгээд байна уу гэдэг нь тун хачирхалтай. Учир нь, тэд сүүлийн үед хамт яваа нь харагдах болсон бөгөөд зарим эх сурвалжийн мэдээлж байгаагаар Д.Сүндий Н.Ундрахт дэмжлэг үзүүлж яваа болов уу гэх таамаглал байна.
Асуудлыг эргэн санавал, Нэткапитал” ББСБ-ын ТУЗ-ийн дарга Д.Сүндий УИХ-ын 2020 оны сонгуулийн үеэр гэр бүлийн хүчирхийлэгч гэдэг нь олон нийтэд ил болж, АН-аас нэр дэвших эрх олгоогүй. Тиймээс Д.Сүндий “Сахигтун үндсэн хуулийн 19” эвслээс нэр дэвших квот авч, бүр СЕХ-ноос үнэмлэх гардаж байв.

 
Гэхдээ тэдний амьдрал эгээ л нийт монголчуудын чихийг дэлдийлгэсэн тул хуулийн байгууллага анхааралдаа авсан. Харамсалтай нь, гэр бүлийн хүчирхийллийн хэргээ нуухын тулд Д.Сүндий өөрийг нь шалгаж байсан цагдаа нарт хахууль өгч, “мултарсан” байдаг. Тиймээс ч УИХ-ын сонгуульд нэр дэвшихээр өөр нам царайчилсан гэсэн үг. Түүнчлэн хуулийн байгууллагаас Д.Сүндийг авлигын хэргээр шалгаж, шүүхээс гурван жилийн хорих ял оноосон. Гэвч өнгөрсөн жил буюу 2023 оны 11 дүгээр сард магадлангаар орж, чухам л хүмүүжсэн шүү гээд суллагдаж байсан билээ.