Том гүрний том зодоонд монголчууд өртөж эхэллээ

Дэлхийн нөхцөл байдал сүүлийн 10 орчим жилд огцом өөрчлөгдөж том гүрнүүд хоёр гурав хуваагдаж өөрийн нөлөөллийн бүсээ базаж эхэлсэн. Украины дайнаас болж Орос улс барууны ертөнцтэй ил тодоор дайсагнаж бүр том дайны эрмэгт хүрээд байна. Хятад дэндүү томорч нөлөөлөл нь огцом нэмэгдэж АНУ-тай шууд шөргөөцөлдөж эхэллээ. 

Ийм нөхцөлд нөгөө “халиуны зулзага” Монголыг бүх талаас зулгааж байна. Украинд болж байгаа дайнд дундын байр суурьтай байгаад Орос асар их дургуйцэж бензин цахилгаанаа хязгаарлаж нэг дохио өгсөн.

Хятадууд ч гэсэн үе үе нүүрсний экспортоо багасгаж боомтоо заримдаа нээж, заримдаа хаагаад байгаа. Бас л АНУ эсвэл Оросын дагаад явчих вий гэдгээс болгомжлуулж сануулж байгаа хэрэг.

Харин АНУ эдийн засгийн хувьд монголчуудад нөлөөлөл багатай болохоор өөр аргаар үзэж байгаа бололтой. Саяхнаас Сү.Батболдын гэдэг нь хаана ч нотлогдоогүй нэгэн Солонгос бизнесмены байрыг нь хураах иргэний маргааныг дахин үүсгэсэн мэдээ гарсан. Хэдэн орны шүүхээр тэр дотроо Нью Йоркийн дээд шүүхээр хэлэлцэгдээд анх гомдол гаргасан хүмүүс нь улс төрийн зорилготой байсан гэдэг нь ил тод харагдаад асуудал нэгэнт шийдэгдсэн иргэний маргааныг дахин сөхдөг нь ямар зорилготой билээ? 

Дэлхийн том гүрнүүдийн хагаралд Монгол дундын байр суурьтай байгаад бас л дургүй байгаа юм болов уу даа. Таван толгойн орд газрыг авахаар Оросын ч олигархууд, Хятадын  Шэнхуа ч, Америкийн Пийбоди зэрэг байж болдог хамгийн том компаниуд улайран дайрч байсан. Яг Сү.Батболдыг Ерөнхий сайд байхад нь ид тэмцэл өрнөж эцсийн дүндээ Таван толгойг алинд нь ч өгөөгүй. 100 хувь Монгол төрд авч үлдсэн. Бас бүр дээрээс нь монгол иргэн бүрт хувьцаа тарааж өгөөд дараа дараагийн шуналтай дарга нар элдэв буруу алхам хийхээс хаасан. Нэгэнт ард түмний өмч болгоод хувьцааг нь тараасан ордыг өөр гүрний эзэмшилд өгөх боломжгүй болгож түгжсэн. Өнөөдөр энэ орд л улсаа тэжээж олон арван мянган хүн, компани ажилтай орлоготой, төрөөс цалин тэтгэвэр нэмэхтэйгээ байгаа. Тухайн үед нь аль нэгэнд нь саймширч яаж өгөөд тавиад туучаагүй юм, Монголын заяа гэж бас байдаг бололтой. 

Украины дайн, АНУ Хятадын шөргөлцөөн дээд цэгтээ хүрч байгаа өнөөдрийн нөхцөлд Монгол ийм дундын байр суурьтай байгаад дуртай гадныхан ч алга бололтой. Аль нэг талд нь орж дагалдан болохыг бүгд л шаардаж байгаа бололтой. Үүний нэг үзүүлэн болгоод яг сонгуулийн өмнө нь шүүхээр нэгэнт шийдэгдсэн Сү.Батболдын нэр нь хавчигдсан иргэний маргааныг дахин сэргээхээр шийдсэн юм болов уу даа. 

“Щвейцар лугаа адил” дундын байр суурьтай улс байх аль Данзан Ерөнхий сайдын мөрөөдөл ч тун хатуухан юм даа. Тийм байлгах гэсэн үеийнхэндээ ч хатуу юм. Гэхдээ яалтай билээ дээ, Монголын заяа түшинээ…